Дар Паёми навбатии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба Маҷлиси Олӣ боло бурдани сатҳу сифати таълим дар тамоми зинаҳои таҳсилот яке аз мавзӯъҳои меҳварӣ буд. Чунин таваҷҷуҳи хоси Сарвари давлат ба ин масъала аз он шаҳодат медиҳад, ки воқеан рушди соҳаи илму маориф ҳамеша дар авлавияти сиёсати давлатӣ қарор дорад.

 

Ин дар ҳолест, ки барои ташаккули неруҳои зеҳнӣ ва тафаккури миллӣ мактабу маориф нақши марказӣ дорад. Зеро пойдории ҳар давлату миллат ва ҷомеаи ваҳдатсолор қабл аз ҳама ба неруҳои зеҳнӣ такя менамояд, ки шаклгирии он дар заминаи таълиму тарбияи сифатнок аст. Ин аст, ки аз ибтидои Истиқлолияти давлатӣ ва замони бисёр ҳассос Сарвари давлат маорифро соҳаи афзалиятнок эълон дошта, ба ислоҳоти соҳа таваҷҷуҳ карданд. Ва маҳз ибтикороти бешумору ояндасоз буд, ки маориф зина ба зина рушду такмил ёфта, низоми нави таълиму тарбия ҷорӣ гардид.

Ҳар сол дар мамлакат ба манзури тақвияти иқтидори соҳа ва такмили сифати таълим садҳо иншоот – муассисаҳои нави таълимӣ бунёд ва мавриди истифода қарор мегиранд. Тавре дар Паём зикр гардид, ин раванд новобаста аз мушкилоти пандемияи ҷаҳонӣ идома пайдо карда, соли 2020 дар мамлакат 157 муассисаи таҳсилоти миёнаи умумӣ, ибтидоӣ, миёнаи касбӣ ва синфхонаҳои иловагӣ барои 63000 ҷойи нишаст бунёд ва ба истифода супурда шуданд. 

Бояд гуфт, ки дар робита ба эълон гардидани солҳои 2020 - 2040 “Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи маориф” дар як соли охир таваҷҷуҳ ба ин самт бештар гардида, ҳоло дар тафаккури техникии насли наврас ҷунбише ба амал омадааст, ки дар ояндаи наздик натиҷаҳои бисёр чашмрас ба миён хоҳад овард. 

Пешвои миллат дар Паёми навбатӣ низ ба ин масъала таваҷҷуҳ намуда, зарур шумурданд, ки ба хотири боз ҳам бештар ба омӯзиши илмҳои риёзиву дақиқ ва табиӣ ҷалб кардани наврасону ҷавонон, олимону муҳаққиқон ва устодону омӯзгорон ҳамасола Озмуни ҷумҳуриявӣ зери унвони «Илм – фурӯғи маърифат» гузаронда шавад. 

Мо – ҷомеаи омӯзгорон мутмаинем, ки ин амр дар баланд бардоштани сатҳи маърифатнокӣ, бахусус, тавсеаи ҷаҳонбинии илмиву техникӣ ва рушди илмҳои дақиқ такони нав мебахшад. Дар навбати худ, чунин иқдомоти таҳкимбахш дар низоми маориф аз ҳар омӯзгор ҷиҳати мусаллаҳ будан бо донишҳои замонавӣ ва тарбияи насли наврас дар рӯҳияи худшиносӣ, ватанпарастиву содиқ будан ба арзишҳои миллӣ масъулияти бештар тақозо менамояд. Аз ин рӯ, зарур аст, ки якҷо бо рушди инфрасохтори соҳа мо, омӯзгорон дар баланд бардоштани сифати таълиму тарбия беш аз ҳар вақти дигар фаъолтар бошем ва дар татбиқи ҳадафҳои олии Сарвари давлат саҳми шоиста гузорем. 

 

Гулсара САЙФИДДИНОВА, 

омӯзгори МТМУ № 24, шаҳри Душанбе