5 март Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон раиси раёсати Бонки авруосиёии рушд Николай Подгузовро ба ҳузур пазируфтанд.

 

Ҳангоми мулоқот масъалаҳои густариши ҳамкориҳои Тоҷикистону Бонки авруосиёии рушд мавриди баррасӣ қарор гирифтанд.

- Тоҷикистон ба масъалаи рушди ҳамкориҳои судманд бо Бонки авруосиёии рушд, аз ҷумла дар самти ҷалби сармоя ба бахшҳои афзалиятноки иқтисодиёт, ҳавасманд аст,- таъкид намуданд Президенти мамлакат муҳтарам Эмомалӣ Раҳмон.

Аз сатҳи ҳамкории дуҷониба ва иқдоми Ҳукумати Федератсияи Россия оид ба татбиқи лоиҳаи сохтмону муҷаҳҳазгардонии панҷ муассисаи таълимӣ дар Тоҷикистон, ки тавассути Фонди авруосиёии устуворӣ ва рушд амалӣ мегардад, изҳори қаноат шуд. Мавриди зикр аст, ки идоракунандаи фонди мазкур Бонки авруосиёии рушд мебошад.

Ҷонибҳо зимни вохӯрӣ оид ба имкониятҳои ҳамкории пурсамар ва ҷалби сармояро барои рушди саноат, аз ҷумла истихроҷу коркарди маъдан, саноати хӯрокворӣ ва сабук дар асоси коркарди маҳсулоти кишоварзии аз ҷиҳати экологӣ тоза ва рақамикунонии иқтисодиёт, табодули андеша карданд.

Дар бахши энергетика иштироки бонк дар татбиқи лоиҳаҳои сохтмону таҷдиди неругоҳҳои хурду бузург ва бунёди хатҳои интиқоли барқ зарур шумурда шуд.

Зимни мулоқот, ҳамчунин, оид ба дигар масъалаҳои мавриди таваҷҷуҳ гуфтугӯи судманд сурат гирифт.

 

 

Николай Подгузов, раиси раёсати Бонки авруосиёии рушд, ки баъд аз мулоқот бо Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ҳузури хабарнигорон суҳбат мекард, аз таҳкими ҳамкории судманди Тоҷикистон бо ин ниҳоди молиявӣ истиқбол намуд.

Раиси раёсати Бонки авруосиёии рушд дидору мулоқоташ бо Сарвари давлатро фарогиру судманд арзёбӣ намуда, изҳори бовар намуд, ки он дар тавсеаи самтҳои минбаъдаи ҳамкорӣ такони нав мебахшад. 

- Дар ҷараёни суҳбат мо ба татбиқи лоиҳаҳо дар бахши энергетика, логистика ва дигар самтҳо таваҷҷуҳ зоҳир намудем. Ҳамчунин, амалигардии тарҳи сохтмону муҷаҳҳаз кардани 5 муассисаи таълимии русӣ, ки тавассути Хазинаи авруосиёии устуворӣ ва рушд рӯи даст гирифта шудааст, дар меҳвари гуфтугӯ қарор гирифт, - иброз дошт Николай Подгузов.

Номбурда ба хабарнигорон иттилоъ дод, ки сохтмони ин муассисаҳои таълимӣ, ки дар сатҳи олӣ миёни Тоҷикистону Россия мувофиқа шудааст, моҳи апрели соли ҷорӣ оғоз гардида, тибқи дурнамо сентябри соли 2022 ба анҷом мерасанд. – Мо талош хоҳем кард, ки бунёди муассисаҳои таълимӣ тибқи лоиҳа дар вақти муақарраршуда бунёд ва ба фаъолият оғоз намоянд, - таъкид кард раиси раёсати Бонки авруосиёии рушд. 

 

Фирӯз РАҲМОНИЁН, 

«Ҷумҳурият»