ҲАБСИ АБАД

ба қотили як ноболиғ

Суди Олии Ҷумҳурии Тоҷикистон сокини шаҳри Ваҳдат Зафар Раҷабовро барои содир намудани ҷинояти махсусан вазнин бар асоси чанд моддаи Кодекси ҷиноятӣ ба ҳукми абад маҳкум кард.

Дар ин бора маркази матбуоти Прокуратураи генералӣ хабар дод. Тибқи иттилои манбаъ, парвандаи ҷиноятӣ нисбат ба маҳкумшударо прокуратураи ноҳияи Рӯдакӣ бо моддаҳои 104, қисми 2, бандҳои “в, л” (одамкушӣ…) ва 138, қисми 3, банди “а” (таҷовуз ба номус…) Кодекси ҷиноятӣ ба итмом расонда, барои моҳиятан баррасӣ намудан ба Суди Олӣ ирсол намуда буд.

Судшуда моҳи августи соли 2020 ҳангоми кӯшиши дастдарозӣ ба номуси хурдсол З. Сафарова ба муқобилият рӯ ба рӯ шуда, ноболиғро латукӯб намудааст, ки дар натиҷа ҷабрдида ҷароҳати вазнини ҷисмонӣ бардошта, баъдан дар ҷойи ҳодиса ба ҳалокат расидааст. 

Бар пояи ҳукми суд, акнун З. Раҷабов барои чунин кирдори разилона тамоми умр дар муассисаи ислоҳии низомаш махсус нигоҳ дошта мешавад. 

 

 

СУДХӮР

ё ҷавобгарӣ барои мардумфиребӣ

Мақомоти корҳои дохилӣ бар асоси муроҷиати марди 32-солаи ноҳияи Шоҳмансур ҳолатеро мавриди тафтиш қарор додааст, ки дар он як сокини пойтахт ба тақаллуб ва фиреби шаҳрвандон гумонбар мешавад.

Сомонаи ВКД аз ин шаҳрванд марди 34-сола ном бурда, иттилоъ медиҳад, ки ӯ 18 декабри соли 2020 бо роҳи фиреб ба боварии муроҷиаткунанда даромада, барои гирифтани раводид ва корт ба давлати Латвия аз вай 33600 сомонӣ гирифтааст. Ҳамчунин, гумонбар бо ҳамин шева 19 декабри соли гузашта аз ҷавони 26-сола, сокини дигари шаҳри Душанбе, 3870 доллари ИМА гирифта, то ҳол ин маблағҳоро барнагардондааст.

 

ДУЗДӢ

Боздошти ғоратгаре, ки такроран даст ба ҷиноят зад

Як сокини ноҳияи Бобоҷон Ғафуров (марди 30-сола), ки қаблан бо моддаи 244 Кодекси ҷиноятӣ суд шудааст, боз ба гумони дуздӣ дастгир шуд.

Маркази матбуоти Вазорати корҳои дохилӣ хабар дод, ки гумонбар 6 марти соли ҷорӣ бо роҳи пинҳонӣ ба маркази хизматрасонии бонкии «Сомғор» - и ноҳияи Бобоҷон Ғафуров (филиали ҶСП бонки «Арванд» дар шаҳри Хуҷанд) ворид шуда, аз он ҷо ашёи техникиву дигар лавозимотро дуздидааст, ки зарари расондашуда 4250 сомониро ташкил медиҳад.

Ҳоло оид ба ин ҳодиса бо моддаи 244, қисми 2 Кодекси ҷиноятӣ (дуздие, ки такроран содир шудааст) парвандаи ҷиноятӣ оғоз гардида, тафтишот идома дорад. 

 

Шуъбаи ҳуқуқи рӯзномаи «Ҷумҳурият»