иҷтимоиёт
РУШДИ СОҲАИ ТАНДУРУСТӢ ДАР ҲОШИЯИ ДАСТУРҲОИ ПЕШВОИ МИЛЛАТ
Таваҷҷуҳи давлату Ҳукумати мамлакат ба соҳаи тандурустӣ сол ба сол бештар мегардад. Омилҳои асосии таҳрикдиҳанда ба ин иқдом афзоиши талабот ба хидматрасонии беҳтар, тараққиёти бесобиқаи фановариҳои тиббӣ ва усулҳои муолиҷа ва зиёд шудани нуфуси аҳолӣ мебошад. Дар ин росто Муассисаи давлатии таълимии “Коллеҷи тиббии шаҳри Бохтар” аз нигоҳи мутобиқат ба талаботи замони муосир барои ҷавонон ба яке аз боргоҳҳои дилпазири андӯхтани маърифату касбият табдил ёфтааст.
– Бо дастгирии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон муассисаи мо ҷавобгӯ ба меъёрҳо ва мақбули муштоқони илму фаномӯзӣ шуд, – мегӯяд Иброҳим Мӯсоев, сарвари коллеҷи мазкур. – Натиҷаи дастгириҳо буд, ки дар давоми чанд моҳи охир 800 курсӣ ва 100 миз барои донишҷӯён, 8 тахтаи электронӣ ва проектор, 20 ноутбук, 63 таҷҳизоти гуногуни тиббӣ харид кардем. Барои назора кардани гирду гӯшаи муассиса ва сабти ҷараёни дарсҳо, ки бо мақсади такмили усули таълим роҳи хубест, 60 камераи мушоҳидавии дорои сифати баланд насб намудем. Ба замми ин, бо илҳом аз ҳидоятҳои Сарвари хирадманди давлат, ки ҳамеша ба роҳандозии машғулиятҳои амалию омӯзишӣ таъкид мекунанд, ду лабораторияи химия ва физикаи муҷаҳҳаз бо ҳама шароитро ба истифода додем.
Азбаски шумораи донишҷӯён сол ба сол рӯ ба афзоиш аст, соли 2017 як бинои баландошёнаи иловагии муҷаҳҳаз бо хурдтарин талабот, назири таҷҳизоти садодиҳандаи зиддисӯхторӣ сохта, мавриди истифода қарор додем.
Дар маҷмӯъ, 116 синфхона барои баҳрабардории шогирдону устодон фароҳам оварда шуд. Шумораи синфхонаҳои қабули амалӣ ба 42 адад расид, дар онҳо муляжҳои гуногун барои аз худ кардани фанҳои анатомия ва физиологияи одам, барои расондани ёрии аввалияи тиббӣ ба кӯдакон ва калонсолон, ЭКГ, оксигенератор, симулятори зани зоянда, аёният ва асбобҳо барои гузарондани машғулиятҳо аз фанни ҷарроҳия, 14 синфхонаи лексионии дорои тахтаҳои электронӣ, чор синфхонаи компютерӣ, як синфхонаи лингофонӣ барои омӯхтани забони англисӣ, як озмоишгоҳ аз фанни биология, як озмоишгоҳ аз фанни химия, як маркази тестӣ ва ғайраҳо муҳайё шудаанд.
Як нукта боиси зикр аст, ки давоми чанд соли охир таҷҳизоту аёниятҳои солҳои пешин, бо ҳамгунҳои замонавияшон иваз гардиданд. Хобгоҳи муассиса бо оби гарму хунук, мошинаи ҷомашӯйӣ, яхдон ва дигар ҷиҳози зарурӣ таъмин буда, феълан 157 донишҷӯе, ки аз шаҳру ноҳияҳои дур ва Афғонистон омадааст, дар он иқомат дорад.
– Илова ба ин, - иброз дошт Иброҳим Мӯсоев, – супориши Пешвои муаззами миллат муҳтарам Эмомалӣ Раҳмон аст, ки дар назди муассисаҳои таълимии тиббӣ беморхонаҳо эъмор шаванд. Дар мувофиқа бо раиси вилоят Қурбон Ҳакимзода лоиҳаи бинои панҷошёнае, ки бояд дар ҳудуди коллеҷ бунёд созем, омода гардид. Корҳои сохтмонӣ аз моҳи майи соли ҷорӣ оғоз мешаванд. Тасмим аст, ки дар қабати якуму дувуми бино дармонгоҳ ва беморхона таъсис ёбанд. Ошёнаҳои се, чор ва панҷ таълимгоҳанд. Мақсад аз сохтани чунин маҷмаа он аст, ки шогирдони мо имкони доимии машғул шудан ба корҳои амалиро дошта бошанд. Ҳамзамон, дар шафати маҷмааи нав бунёди ошхона барои 100 кас дар назар аст.
Таваҷҷуҳ ба донишандӯзии таълимгирандагон, чуноне зикр шуд, зиёд буда, дар ин баробар дар муассиса китобхонаи дорои 22 ҳазор китоб, ки аз ин 18 ҳазораш адабиёти тахассусист, мавриди баҳрабардорӣ қарор дорад. Коллеҷ дорои ҳафт шуъба: кори момодоягӣ, табобатӣ, ҳамширагӣ, тиббӣ-ташхисӣ, тиббӣ-профилактикӣ, дандонсозӣ ва фармасевтӣ мебошад.
Натиҷаи ҳамин пешравиҳост, ки нуфузи Муассисаи давлатии таълимии “Коллеҷи тиббии шаҳри Бохтар” дар миёни таълимгоҳҳои дохили кишвар ва берун аз он афзуда, шумораи донишҷӯёнаш сол ба сол бештар мегардад.
Муҳаммадзоиршо ШАРИФЗОДА,
Зокир ҲАСАН, “Ҷумҳурият”
Баёни ақида (0) Санаи нашр: 12.03.2021 №: 52 Мутолиа карданд: 560