26 январ Паёми навбатии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба Маҷлиси Олӣ «Дар бораи самтҳои асосии сиёсати дохилӣ ва хориҷии ҷумҳурӣ»  ироа гардид. Ҷиҳати иҷрои бандҳои нақшаи чорабиниҳо оид ба иҷрои вазифаҳое, ки дар Паём зикр гардиданд, нақша - чорабиниҳо бо қарори раиси ноҳия аз 19 феврали соли 2021, № 57,  таҳия ва тасдиқ гардида, аз рӯи он корҳо ба роҳ монда шудаанд, - иброз дошт Маҳмадшоҳ Давлатзода, раиси ноҳияи Сангвор.

Як нукта боиси зикр аст, ки дар ҷамоатҳои деҳоти ноҳия, деҳаҳои сераҳолӣ бо иштироки раиси ноҳия ва дигар масъулон   суҳбату вохӯриҳо баргузор гардида, муҳтаво ва нуқтаҳои асосии Паём ба саҳми сокинон расонда мешаванд. Мардуми мо дар даврони соҳибистиқлолӣ аз уҳдаи иҷрои бисёр корҳои ҷиддиву сарнавиштсоз бо сарбаландӣ баромаданд ва ба хотири таҳкими пояҳои давлати миллии худ минбаъд низ содиқона ва софдилона заҳмат мекашанд. Барои дар сатҳи баланд таҷлил намудани Ҷашни 30 - солагии Истиқлолияти давлатии Ҷумҳурии Тоҷикистон дар ноҳияи Сангвор 107 иншоот ба нақша гирифта шуд, айни замон 70 адади он дар истифода қарор дорад. Аз шумори иншооти ҷашнӣ 21 – то ба соҳаи маориф, 10 адад ба соҳаи тандурустӣ, 3 ба соҳаи фарҳанг, 11 ба соҳаи варзиш ва сайёҳӣ, 6 ба соҳаи саноат, 7 ба соҳаи роҳдорӣ ва 49 иншоот ба дигар соҳаҳо рост меоянд. Дар сохта ба истифода додани онҳо саҳми хизматчиёни давлатӣ, соҳибкорону шахсони саховатпеша ва ходимони дин назаррас аст. Дар маркази ноҳия ва ҷамоатҳои деҳот корҳои ободонию созандагӣ имрӯзҳо вусъати тоза гирифтаанд.  

Бовар дорем, ки то ҷашни муқаддасу бузурги миллиамон мо боз корҳои зиёди созандагиро амалӣ месозем, тамоми захираву имкониятҳоро барои бунёди корхонаҳои хурду миёна сафарбар, ҷойҳои нави корӣ муҳайё менамоем ва сатҳи некуаҳволии халқамонро боз ҳам беҳтар мегардонем,-  зикр кард Маҳмадшоҳ  Давлатзода ва илова намуд. - Дар ин раванд вазифаи виҷдониву инсонии ҳар яки мост, ки истиқлолу озодии давлати тоҷиконро чун неъмати муқаддаси ҳаётамон ва мисли гавҳари бебаҳои зиндагиамон гиромӣ дорем ва барои ҳимояи он ҳамеша омода бошем. Мо бояд ба хотири пешрафти давлати соҳибихтиёрамон ва Ватани аҷдодиамон – Тоҷикистони озоду маҳбуб минбаъд низ сарҷамъона заҳмат кашем ва барои наслҳои ояндаи халқи худ мулки ободе мерос гузорем, то ки онҳо бо натиҷаҳои заҳмати ватандӯстонаи мову шумо ифтихор намоянд. Таърихи пурифтихори халқи тоҷик мактаби бузурги худшиносӣ мебошад ва мо вазифадорем, ки ба он арҷ гузорем, саҳифаҳои дурахшони қаҳрамониву диловарии гузаштагони худро омӯзем ва онро ҳамчун асоси ғояи ватандӯстиву садоқат ба Ватан ташвиқ намоем. 

 

Муҳаммадзоиршо 

ШАРИФЗОДА, “Ҷумҳурият”