Носирҷон Маъмурзода, мудири шуъбаи иттилоотию таҳлилии дастгоҳи раиси вилоят, ба хабарнигори «Ҷумҳурият», гуфт, ки ҷамъомадро прокурори вилоят Абдураҳим Раҳимзода ифтитоҳ бахшида, пас аз шодбошии ҳамкасбон, суханро ба раиси вилоят Қурбон Ҳакимзода дод.

Раиси вилоят аҳли толорро ба муносибати иди касбӣ – Рӯзи кормандони мақомоти прокуратура самимона табрику таҳният гуфта, иброз дошт, ки аз оғози даврони истиқлолият кормандони прокуратура бо хизмати содиқонаи худ намунаи олии хизмат ба Ватанро нишон дода, дар шароити муқовимати шадиди мусаллаҳона вазифаи муқаддаси хешро дар барқарор намудани сохти конститутсионӣ сарбаландона иҷро намуда, дар бунёди ҷомеаи демократӣ, ҳуқуқбунёд ва дунявӣ, ки волоияти қонун асоси онро ташкил медиҳад, саҳми арзанда гузоштанд.

Солҳои соҳибистиқлолӣ имконият ба вуҷуд омад, ки сохтмон ва азнавсозиҳо ҷараёни тоза гирифта, шароити корӣ дар мақомот  беҳтар шавад. Дар ин давра бунёди биноҳои нав ва иловагии прокуратураи вилоят ва ҳамаи прокуратураҳои шаҳру ноҳияҳо аз таъмири хушсифат бароварда шуд. Дар ноҳияҳои Восеъ, Ёвон, Фархор, Балҷувон, Абдураҳмони Ҷомӣ, Вахш, Данғара, Муъминобод, Мир Сайид Алии Ҳамадонӣ, Ҷайҳун, Хуросон ва шаҳри Бохтар биноҳои нав бо тарҳи зебои замонавӣ ба истифода дода шуда, дигарашон таъмир гаштанд. 

Таъкид шуд, ки вазъи тағйирёбандаи ҷаҳони имрӯза ва хусусияти устувор пайдо намудани зуҳуроти хатарноки замони муосир, аз ҷумла терроризму экстремизм, қочоқи силоҳ, гардиши ғайриқонунии маводи мухаддир, киберҷиноятҳо ва дигар ҷиноятҳои фаромиллӣ, ки башариятро ба ташвиш овардаанд, моро водор месозанд, ки ба масъалаҳои таъмини амнияти кишварамон диққати аввалиндараҷа диҳем. 

- Бовар дорем, ки ҳар кадоми шумо манфиати давлату миллат ва обрӯи касбии худро муқаддас дониста, минбаъд низ риояи бечунучарои қонуният ва иҷрои талаботи интизоми хизматиро дар сафҳои худ тақвият мебахшед ва дар таҳкими волоияти қонун, ҳимояи дастовардҳои сокинони вилоят саҳми арзанда гузошта, ҳомии боэътимоди халқу Ватан будани худро собит менамоед, - афзуд Қурбон Ҳакимзода.

Дар ҷамъомад, инчунин, як қатор собиқадорони мақомоти прокуратура баромад карда, доир ба фаъолият ва нақши ин ниҳод дар таҳкими пояҳои давлатдорӣ ва таъмини волоияти қонун изҳори назар карданд.

Сипас, ба чанде аз кормандони пешқадам ва собиқадорони мақомоти прокуратураи вилоят ва шаҳру ноҳияҳо ба муносибати рӯзи иди касбиашон ифтихорнома ва мукофотҳои мақомоти иҷроияи ҳокимияти давлатии вилоят тақдим шуданд.