Дар шаҳри Душанбе бо иштироки раиси шаҳр Рустами Эмомалӣ зеристгоҳи барқии 110/35/10 кВ “Саноатӣ”, воқеъ дар кӯчаи Ҷаббор Расулови ноҳияи Сино баъди азнавсозӣ мавриди истифода қарор дода шуд.

Тавре раёсати иттилоот ва робитаҳои хориҷии дастгоҳи раиси шаҳр хабар дод, 9 марти соли 2017 Созишномаи мубодилаи ёддоштҳо миёни Ҳукумати Ҷумҳурии Тоҷикистон ва Ҷумҳурии Ҷопон ба тасвиб расонда шуда, дар асоси созишномаи мазкур 30 июли соли 2017 Созишномаи грантӣ барои азнавсозии зеристгоҳи барқии “Саноатӣ” ва сохтмони зеристгоҳи барқии нав 110/35/10кВ “Пойтахт” бо арзиши умумии 21 миллион доллари ИМА ба имзо расид.

Корҳои сохтмонӣ аз тарафи пудратчии генералӣ “Нишизава” ва зерпудратчӣ ҶСК “Тоҷикгидроэлектромонтаж” бо сифати баланд ба анҷом расонда шудаанд. Дар рафти азнавсозии ду адад трансформатори 25 МВА ба трансформатори 40 МВА-ро иваз карда, сохтори тақсимотии 35 кВ ва сохтори тақсимотии 10 кВ иборат аз 47 чашмаки замонавӣ иваз намуданд.

Айни ҳол зеристгоҳ минтақаи саноатӣ ва аҳолии кӯчаҳои Ҷ. Расулов, С. Шерозӣ, Асадулло Ғуломов, Маяковский ва маҳаллаҳои Роҳи Нав, Меҳнатобод, Арбобхотум, Н. Ганҷавӣ ва ғайраҳоро бо барқ таъмин намуда, хароҷоти шабонарӯзии он дар фасли зимистон 540 000 кВт/ст-ро ташкил медиҳад. Зеристгоҳи мазкур 18 480 муштариро бо барқ таъмин менамояд, ки аз ин шумора 17 480 муштарии маишӣ буда, боқимонда корхонаҳои саноатӣ ва тиҷоратӣ мебошанд.

Баъд аз таҷдиди зеристгоҳ ва таъмини он бо таҷҳизоти барқии муосир, шумораи садамаҳои технологӣ нисбат ба солҳои 2017 -ум 3 маротиба кам гашта, сифати таъминоти барқ низ беҳтар ва сарфи технологии он нисбат ба соли 2017 ба миқдори 1,4% кам шудааст.

Бори аввал дар зеристгоҳи барқии мазкур сохтори тақсимотии 10 кВ-и дуқабата бо воситаҳои ҳимояи микропротсессорӣ ва кори фоиданокиашон баланд ба истифода қарор дода шуд, ки хизматрасониашон осон ва қулай мебошад.

Ҳамаи ин пешравиҳо дар соҳаи энергетика дар давраи соҳибистиқлолӣ, бо дастгирии Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва иқдомҳои созандаи раиси шаҳри Душанбе Рустами Эмомалӣ ба истиқболи сазовори Ҷашни 30 - солагии Истиқлолияти давлатӣ амалӣ гашта истодаанд.

 

Лашкар ШАРИФЗОДА, «Ҷумҳурият»