18 март Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар чорабинии сатҳи баланд – “Татбиқи ҳадафу вазифаҳои Рӯзномаи 2030 роҷеъ ба масъалаҳои об”, ки дар қароргоҳи СММ дар шаҳри Ню-Йорк ба таври маҷозӣ баргузор шуд, иштирок ва суханронӣ карданд.

 

Мавриди зикр аст, ки чорабинии мазкур дар асоси қатъномаи аз ҷониби ҳайати Ҷумҳурии Тоҷикистон пешниҳодшудаи Маҷмаи умумии СММ аз 18 марти соли 2018 таҳти унвони “Бознигарии миёнамуҳлати фарогири Даҳсолаи байналмилалии амал “Об барои рушди устувор, солҳои 2018 – 2028” доир шуд.

Мавзӯи ҳамоиш “Густариши ҳамкориҳои бисёрҷониба ва суръат бахшидани амалҳои мушаххас ҷиҳати расидан ба ҳадафу мақсадҳои Рӯзномаи 2030-и марбут ба масъалаҳои об ва Ҳадафҳои рушди устувор” мебошад.

Президенти мамлакат муҳтарам Эмомалӣ Раҳмон яке аз аввалин ходимони давлатӣ буданд, ки дар ин ҷаласаи сатҳи баланд оид ба аҳамият ва ҳадафҳои эълони Даҳсолаи байналмилалии амал “Об барои рушди устувор, солҳои 2018 – 2028”, ки ба татбиқи Ҳадафҳои рушди устувори марбут ба об мусоидат мекунанд, суханронӣ карда, таъкид доштанд, ки бо назардошти таҳдидҳои муосир ва таъсири ҳамагирии COVID – 19, ин масъала аҳамияти хоса касб кардааст.

Дар чорабинии “Татбиқи ҳадафу вазифаҳои Рӯзномаи 2030 роҷеъ ба масъалаҳои об”, ҳамчунин, раиси Маҷмаи умумии СММ Волкан Бозкир, муовини Дабири кулли СММ Амина Муҳаммад, президенти Шӯрои иҷтимоӣ ва иқтисодии СММ Мунир Акрам, Сарвазири Шоҳигарии Нидерланд Марк Рутте, раиси абзори “СММ ва об” Жилбер Унгбо ва дигар коршиносони сатҳи байналмилалӣ суханронӣ намуданд.