Бо истифода аз фурсат, ба ҳамаи кормандони соҳаи тандурустӣ, махсусан, ба табибон ва ҳамшираҳои шафқат, ки дар шабу рӯзҳои авҷи бемории сироятии коронавирус ба савганди касбии худ содиқ монда, барои табобати мардуми Тоҷикистон софдилона заҳмат кашиданд ва ҷони ҳазорон нафар ҳамватанонамонро аз марг наҷот доданд, бори дигар сипосу миннатдории самимӣ баён менамоям. 

 

Ин суханонро, ки Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар Паёми навбатиашон ба Маҷлиси Олӣ ироа намуданд, ба мо - кормандони соҳа илҳоми тоза бахшид. Арзи сипоси Пешвои миллат масъулияти моро афзуд ва водошт, ки дар иҷрои рисолати касбӣ аз пештара дида ҷиддитар муносибат намоем.

Қобили зикр аст, ки дар масъалаи пирӯзӣ ба бемории COVID - 19 Ҳукумати кишвар ва ҳам Пешвои миллат нақши басо созгор  доранд. Маҳз дастуру супоришҳои Пешвои миллат буд, ки беморхонаҳои кишвар ҳини авҷи бемории COVID - 19 ҳамаҷониба дастгирӣ ёфт. 

Дар ин муддат ҷиҳати ба табобат фаро гирифтани гирифторони COVID - 19 зиёда аз 30 беморхона махсус бо 7000 кат сафарбар гардиданд. Дар ин муассисаҳо 5400 нафар табибону кормандони соҳа дар хизмати халқ қарор доштанд.  Илова бар ин, дар 92 муассисаи тиббӣ 16 ҳазор кат барои беморон омода шуд ва тамоми талоши табибон барои муолиҷаи дуруст равона гардид. Дар ин муддат аз ҷониби мутахассисони кишвар баъзе  маводи доруи, ки қобилияти зиддивирусӣ доранд, истеҳсол шуд. Олимони кишвар бо истифода аз имкониятҳои мавҷуда ба истеҳсоли маводи гипохлорити  натрий, ки дар ҳама давлатҳои дунё чун маводи антисептикӣ барои безараргардонии вирусҳо васеъ истифода мешавад, оғоз намуда, тамоми беморхонаҳоро ройгон ба ин мавод таъмин намуданд. Яъне, барои аз байн бурдани   COVID – 19 ба кормандони соҳаи тиб Ҳукумати кишвар, Пешвои миллат, олимону мутахассисон кумак расонданд. Натиҷаи ҳамин талошҳо буд, ки имрӯз Тоҷикистон бе COVID - 19 аст. Аммо тавре дар Паём зикр шуд: «Ин чунин маъно надорад, ки  мо ба саломатии худ ва атрофиён бепарвоӣ зоҳир намоем, балки чун пештара бояд ҳушёр бошем, ба қоидаҳои беҳдошти шахсиву ҷамъиятӣ эътибори ҷиддӣ диҳем ва ҳамдигарро эҳтиёт кунем».

 

Заррина ФАЙЗАЛИЕВА,

сармомодояи таваллудхонаи № 2 шаҳри Душанбе