Ҳифзи иҷтимоии аҳолӣ яке аз самтҳои афзалиятноки сиёсати давлат ва Ҳукумати Ҷумҳурии Тоҷикистон ба шумор рафта, таҳти таваҷҷуҳи доимии Пешвои миллат муҳтарам Эмомалӣ Раҳмон қарор дорад. Ҳамин аст, ки соҳа тадриҷан рушд ёфта, вазъи хизматрасонии иҷтимоӣ мутобиқ ба талаботи замон беҳтар мешавад. 

Роҷеъ ба ин мавзӯъ Маҳмадюсуф Достиев, директори Маркази ҷумҳуриявии тавонбахшӣ ва будубоши доимии пиронсолон ва маъюбон дар ноҳияи Кӯшониён, зимни суҳбат ба хабарнигори рӯзнома гуфт, ки муассиса баҳри  амалӣ намудани барномаҳои миллӣ тамоми саъю кӯшиши худро равона намудааст. Дар муассиса бо ҷалби соҳибкорони ватанӣ ҳуҷраи варзишӣ - шифоӣ бо ду велосипеди маъюбӣ ва як роҳдави варзишӣ мавриди истифода қарор гирифт. Айни замон дар ҳуҷраи мазкур 43 нафар ва дар ҳуҷраи маҳсдармонӣ 56 нафар бошанда муолиҷа мешаванд. 

Давоми се моҳи соли ҷорӣ кормандони муассиса оид ба тавонбахшӣ ва нигоҳубини бошандагон як зумра корҳоро ба сомон расонданд. Аз ҷумла, дар муассиса доруворӣ аз рӯи тақсимоти умумии бошандагон ва мувофиқи меъёр ҷудо мегардад. Маводи доруворӣ дар асоси тавсияи табибон ба бошандагон расонда мешавад.

Ҳамчунин, баҳри солимгардонӣ ҳуҷраи гиёҳдармонӣ ташкил шудааст. Гиёҳҳо дар асоси шартнома аз ҶДММ «Фарм Суғд» дастрас мешаванд. Дар се моҳи соли ҷорӣ 27 бошанда аз ҳисоби гиёҳҳои шифобахш табобат ёфтанд.

Дар муассиса ситоди фаврӣ вобаста ба паҳншавии бемории коронавирус ташкил шудааст. Бо ҷалби мутахассисони сироятшинос омӯзиши тамоми кормандон ҷиҳати пешниҳоди хизматрасонии тиббию санитарӣ ва иҷтимоӣ ба бошандагони гумонбар ва ё аломатҳои муайянкунандаи коронавирусдошта семинар - машварат гузаронда шуд. Масъалаи захираи лавозимоту таҷҳизоти зарурии тиббӣ (ниқобҳо, либосҳои махсус, ҳароратсанҷ, маҳлули хлор), маводи дорувориву безараргардонӣ, маҳсулоти хӯрокворӣ ва либосҳои гарм таҳти назорати доимии роҳбарият қарор дорад. Корҳои безараргардонии бинои маъмурӣ, ҷойи хоби бошандагон, анборҳо, ошхона, обгурез, партовгоҳ ва дигар манбаъҳои сироятӣ бо риояи меъёрҳои санитарӣ хуб ташкил шудаанд. Ҳуҷраи эҳёгарӣ бо дастгоҳи нафасдиҳии сунъӣ ташкил  шудааст.   

Ба ҳамаи ин нигоҳ накарда, дар муассиса шуъбаи  тавонбахшӣ бо сабаби нарасидани лавозимоти тиббию санитарӣ фаъолият намекунад. Агар соли равон бо дастгирии Вазорати  тандурустӣ ва ҳифзи иҷтимоии аҳолӣ шуъба ба фаъолият оғоз намояд, на  танҳо мушкили маъюбони муассисаи мазкур, балки мушкилоти дигар муассисаҳои ба он наздик низ ҳалли худро  хоҳанд ёфт.

 

Шаҳбоз АБРОР, 

«Ҷумҳурият»