Чун анъана ҳар сол шурӯъ аз моҳи феврал то охири моҳи март дар тамоми манотиқи кишвар маъракаи оммавии ниҳолшинонӣ сурат мегирад. Бо ин мақсад, дар шаҳри Хуҷанд ярмарка - фурӯши ниҳолҳо баргузор гардид. Дар чорабинӣ даҳҳо хоҷагиҳои ниҳолу гулпарвар, ҷангал ва манзилию коммуналии сабзгардонии шаҳру навоҳии вилоят ниҳолҳои гуногуни мевадиҳандаю сояафкан, ороишӣ, кӯчати гулҳои рангорангу буттаҳои сарсабзи ороишӣ, тухмии чанд номгӯи зироатҳоро ба фурӯш гузоштанд. 

 

Тибқи маълумоти раёсати идораи кишоварзии вилояти Суғд, дар чорабинӣ беш аз 2 миллион бех ниҳоли дарахтони ороишӣ, сояафкан ва гулу буттаҳо оварда шудааст. Ин аст, ки дар шаҳру навоҳии вилоят то оғози моҳи март ба миқдори 866,3 ҳазор бех ниҳоли мевадиҳанда, наздик ба 9,5 миллион гулу буттаҳо, 300 ҳазор дарахти ҳамешасабз ва 30 ҳазор ниҳоли сояафкан шинонда шуд.

Дар баробари шинондани дарахтон ҳифзу нигоҳубини онҳо аз масъалаи муҳим арзёбӣ мешавад, зеро маҳз бо шукуфоии дарахтони сояафкану бисёрсола пешгирӣ кардани бисёр офатҳои табиӣ имконпазир мегардад. Аз ин рӯ, дар қарори раиси вилоят махсус таъкид мешавад, ки дар мавсими ниҳолшинонӣ ва сабзкорӣ дарахтони гуногуни бисёрсолаи сояафкани паҳнбарг ва ҳамешасабзи ороишии ба маҳал мутобиқ вобаста ба шароити иқлими мавзеъ, меъёр ва талаботи соҳаи ҷангалпарварӣ бештар шинонанда шавад. Аммо, тавре мушоҳида мегардад, солҳои охир дар ҷумҳурӣ дар баробари ниҳолҳои худии сафедору бед, чанор, туту сада боз иловатан ниҳолҳои дигар, аз қабили арча, булут, кастона, ақоқиёи абрешимӣ, санавбари элдарӣ, нахл, софораи ҷопонӣ ё сиҳиндӣ ва ёдроки испанӣ низ, як канори роҳҳову гулгаштҳо, боғҳои фарҳангию фароғатӣ, назди муассисаю ташкилотҳо шинонда мешаванд, ки албатта, ин иқдом ба рангорангии табиати диёр мусоидат мекунад. Аммо, дар бисёр ҳолатҳо аз тарафи масъулини маҳаллаҳо таваҷҷуҳ бештар ба намудҳои арча буда, дарахтони худӣ - сафедор ва бед камтар шинонда мешаванд. Ин дар ҳолест, ки беду сафедор садсолаҳо аз имтиҳонҳои басо сахти табиат гузаштаанд. Аз ин хотир, гузаштагонамон низ аз арча дида, барои иқлими гарми кишварамон дарахтони соябахши беду сафеддор, сада ва чанорро афзал донистаанд.

Хуб мебуд, агар масъулони соҳа зимни баргузории маъракаи муҳими ниҳолшинонӣ ба ҳамин тарафи масъала диққати ҷиддӣ диҳанд. 

 

Ҷовиди АШТӢ,

“Ҷумҳурият”