Қаҳрамони бисёркаратаи Тоҷикистон дастаи «Истиқлол» дар даври панҷуми марҳилаи гурӯҳии Лигаи қаҳрамонҳои КФО – 2021 (гурӯҳи «А») тими «Шабоб ал-Аҳлӣ» (Дубай, АМА)-ро бо ҳисоби 1:0 шикаст дода, бо се пирӯзӣ ва як мусовӣ мавқеашро дар садри ҷадвал мустаҳкам сохт.

 

Голи «тиллоӣ»-и рақобатро дар дақиқаи 90+6 капитани даста Алишер Ҷалилов пас аз партоби Муҳаммадҷон Раҳимов, ки дар дақиқаи 90+5 ба ҷои Аҳтам Назаров ба майдон баромад, вориди дарвозаи бошгоҳи аморатиҳо кард.

Бозигарони душанбегӣ дар ин рақобат то охири  дидор неруи худро сарф намуданд, то ки ғалабаи муҳимро ба даст оварда, гомҳои устувори худро барои баромадан ба марҳилаи плей-офф (1/8-ниҳоӣ) гузоранд. Дар ин зӯрозмоӣ, дар баробари дигар бозигарон, ҳунари волои Алишер Ҷалилов ва Рустам Ятимов, дарвозабон, шоистаи таҳсину офарин аст.

Воқеан, дар ин қувваозмоӣ бахт ба рӯи футболбозони «Истиқлол» хандид. Зеро дастаи «Шабоб ал-Аҳлӣ» аз оғози рақобат пайваста дар хати ҳуҷум бозӣ мекард. Махсусан, дар дақиқаҳои охири нерусанҷӣ бозигарони тими АМА фишорҳои пайдарҳам оварда, ду фурсати муносиби голзаниро фароҳам оварданд, вале яке аз онҳоро Рустам Ятимов бартараф намуд ва дар мавриди дигар тӯб ба тири дарвоза бархӯрд.  

Пас аз бозӣ, сомонаи даста навори муҳити утоқи либосивазкуниро бо унвонии «Тоҷикистон, ба пеш» пахш кард, ки ба қавле футболбозон аз шодӣ «дар курта»-ашон намеғунҷиданд.

Вохӯриҳои «Истиқлол» дар марҳилаи гурӯҳӣ нишон доданд, ки он қодир аст, дар қора бо дилхоҳ даста рақобат кунад. Пеш аз оғози мусобиқот, коршиносон ба ин назар буданд, ки тими навкори (дебютант) Лигаи қаҳрамонҳо дар назди дастаҳои арабӣ ва пуртаҷриба оҷиз хоҳад монд. Вале мо дидем, ки шермардони майдони сабзи тоҷикистонӣ алорағми назари коршиносон ҳунарнамоӣ карданд. Бешубҳа, ин аз он далолат медиҳад, ки варзиши рақами як дар Тоҷикистон бо дастгирии президенти Федератсияи футболи Тоҷикистон Рустами Эмомалӣ ба таври назаррас рушд намуда истододааст ва бошгоҳҳои мо метавонанд бо ҳунарнамоиҳои ҷолиб обруву нуфузи кишварро дар арсаи байналмилалӣ боло баранд.

Ҳамакнун, барои ба даст овардани роҳхати мустақим ба даври плей-офф «Истиқлол»-ро як имтиҳони дигар дар пеш аст. Дар даври охири марҳилаи гурӯҳӣ 30 апрел «Истиқлол» бо тими АГМК (Ӯзбекистон) қувваозмоӣ мекунад.  

Ёдовар мешавем, ки дар бозии дигари даври 5-ум «Ал-Ҳилол» (Арабистони Саудӣ) бар АГМК бо ҳисоби 3:0 ғолиб омад.

 

Маҳмуд БАҲРОМ, шореҳи варзиш

 

Р.S. Ба роҳбарияти дастаи «Истиқлол» дар симмати президенти тим Шоҳрух Саидзода, ҳайати мураббиён ва бозигарон барои баланд бардоштани эътибори Тоҷикистон дар арсаи байналмилалӣ арзи сипос мекунем.