Воқеан, бонувони тоҷик қувваи пешоҳанги кишвар буда, дар таҳкимбахшии дастовардҳои даврони соҳибистиқлол нақши муассир доранд. Ҳоло соҳаеро ёфтан муҳол аст, ки дар он занон пайи фаъолият қарор надошта бошанд. Дар радифи бонувони муваффақ месазад, ки номи Маҳингул Кабирзодаро махсус зикр намоем, ки имрӯзҳо дар ноҳияи Данғара вирди забонҳост. 

Ӯ тӯли 35 соли фаъолият аз ҳурмату эҳтироми баланди мардум бархӯрдор мебошад. Мавсуф дар ноҳияи Восеъ дар оилаи хизматчии давлатӣ - Абдуллои Кабир чашм ба олами ҳастӣ кушодааст. Чун аз ҷавонӣ ба табиб шудан рағбати зиёд дошт, соли 1980 баъди хатми мактаби миёна ҳуҷҷатҳояшро ба Донишгоҳи давлатии тиббии Тоҷикистон ба номи Абуалӣ ибни Сино супорида, онро соли 1986 бо ихтисоси табиби кӯдакона хатм намуд. Фаъолиятро соли 1986 дар беморхонаи марказии ноҳияи Данғара ба ҳайси духтури кӯдакона оғоз бахшид. Аз соли 1988 то соли 1998 мудири ҳуҷраи навзодони шуъбаи таваллудхона ва баъди гузаштани такмили ихтисос дар Туркия, Хитой ва Қирғизистон то соли 2001 духтури занонаи беморхона шуд. Малакаву таҷрибаи ғаниашро ба эътибор гирифта, ӯро соли 2001 ба вазифаи муовини сартабиби беморхона таъйин намуданд.

Маҳингул Кабирзода баъди фаъолияти 25 - сола бенуқсон дар соҳаи тиб, бо амри тақдиру тақозои вақту гардиши рӯзгор ҳатто дар гӯшаи хаёл надошт, ки пешаи дӯстдоштаашро канор гузошта, вориди сиёсат мешавад. Соли 2011 ӯро мудири бахши сабти асноди ҳолати шаҳрвандии ноҳияи Данғара таъйин намуданд. Ҳамзамон, дар давоми фаъолият таҳсилро дар Донишгоҳи давлатии тиҷорати Тоҷикистон идома дода, онро соли 2018 бо дипломи аъло ва ихтисоси ҳуқуқи иқтисодӣ, касби ҳуқуқшинос хатм намуд. 

Имсол бо ташаббуси ӯ дар арафаи Рӯзи Модар ва Иди Наврӯз ва ҷалби соҳибкорон ба 222 кӯдаки то яксола шаҳодатномаи таваллуди ройгон ва ба кӯдакони сегонике, ки дар деҳаи Остонаи ноҳия таваллуд шуданд, аробача тақдим карда шуд. Аз ҳама кори муҳиме, ки ба қавли худаш ӯ соли 2020 анҷом додааст, ин барқароркунии 10 оилаи ҷавон мебошад, ки дар ҳолати ҷудошавӣ қарор доштанд. 

Маҳингул Кабирзода ду маротиба ба муҳлати 10 сол аъзои Кумитаи марказии Ҳизби Халқии Демократии Тоҷикистон интихоб шудааст. Солҳои 2005-2010, вакили маҷлиси вакилони халқи ноҳияи Данғара, ҳамзамон, солҳои 2010-2015, вакили маҷлиси вакилони вилояти Хатлон буд. Меҳнатҳои ӯ бо чандин ифтихорнома қадрдонӣ гардидааст. 

 

Холназар КАСИРОВ, «Ҷумҳурият»