сиёсат
ТОҶИКИСТОНУ ҚИРҒИЗИСТОН. ДАР МАРЗ ЧӢ ГУЗАШТ?
Вобаста ба вазъи баамаломада дар марзи Тоҷикистону Қирғизистон Қӯшунҳои сарҳадии Кумитаи давлатии амнияти миллии Ҷумҳурии Тоҷикистон хабар дод, ки 29 апрели соли ҷорӣ зимни муноқишаи сокинони маҳаллаҳои Сомониёни Ҷумҳурии Тоҷикистон ва Кок-Тоши Ҷумҳурии Қирғизистон шаҳрвандони кишвари ҳамсоя ба тарафи шаҳрвандони мо аз камони шикорӣ оташ кушоданд. Дар натиҷа, Оқил Амаков (соли таваллудаш 1989), сокини маҳаллаи Сомониёни Ҷамоати деҳоти Чоркӯҳи шаҳри Исфараро аз пешониаш захмдор карданд. Номбурда ба беморхонаи марказии шаҳри Исфара интиқол ёфта, вазъи саломатиаш вазнин арзёбӣ мегардад.
Ҳамчунин, худи ҳамин рӯз бар асари тирпарронии шаҳрвандони Ҷумҳурии Қирғизистон шаҳрванди Ҷумҳурии Тоҷикистон Саттор Самадов (соли таваллудаш 1989), сокини маҳаллаи Сомониёни Ҷамоати деҳоти Чоркӯҳи шаҳри Исфара, аз дасту пояш ҷароҳат бардошта, дар беморхонаи марказии шаҳри Исфара бистарӣ гардид. Муноқишаи мазкур 28 апрели соли 2021 дар мавзеи нуқтаи обтақсимкунии «Головной», воқеъ дар болои дарёи Исфара ва ҳудуди деҳаи Хоҷаи Аълои Ҷамоати деҳоти Чоркӯҳ дар натиҷаи амалҳои иғвоангезонаи шаҳрвандони Ҷумҳурии Қирғизистон ва сангпартоии онҳо ҷониби шаҳрвандони Тоҷикистон сар зад. Аз сангҳои партофтаи онҳо 7 шаҳрванди Ҷумҳурии Тоҷикистон ҷароҳатҳои гуногуни ҷисмонӣ бардоштанд, ки дар байни шаҳрвандони Қирғизистон хизматчиёни воҳиди таъйиноти махсус бо либоси шаҳрвандӣ ҳузур доштанд.
Маркази матбуоти Қӯшунҳои сарҳадии КДАМ, ҳамчунин, иттиллоъ дод, ки нимаи дуюми рӯзи 29 апрел дар мавзеи нуқтаи обтақсимкунии «Головной» низомиёни Ҷумҳурии Қирғизистон ба сӯи сарҳадбонони Ҷумҳурии Тоҷикистон оташ кушоданд: «Ҳодисаи мазкур дар ҳолате рух дод, ки тӯли рӯзҳои охир ҷониби Қирғизистон худсарона бандҳои созишномаи қаблан мувофиқашудаи дуҷонибаро бо Тоҷикистон вайрон намуда, нақшаи забти нуқтаи обтақсимкунии «Головной»-ро ба роҳ мондааст».
Қӯшунҳои сарҳадӣ дар баёнияи расмӣ таъкид кардааст, ки тибқи харитаи солҳои 1924 – 1927 ва 1989 иншооти мазкур пурра дар ҳудуди Ҷумҳурии Тоҷикистон қарор дошта, соли 1968 дар давраи Иттиҳоди Шӯравӣ барои обёрии шаҳру ноҳияҳои наздисарҳадии ҷумҳуриҳои Тоҷикистон, Қирғизистон ва Ӯзбекистон истифода мешуд.
Тибқи хабарҳои расида, ҳоло вазъият дар сарҳад муътадил буда, комиссияҳои дуҷонибае, ки оид ба ҳалли низои мусаллаҳонаи 29 апрели соли 2021 дар минтақаҳои наздисарҳадии Тоҷикистону Қирғизистон рухдода, таъсис ёфтаанд, сабабҳо ва оқибатҳои ҳодисаро муҳокима карда, изҳороти муштарак қабул намуданд.
"ҶУМҲУРИЯТ"
Баёни ақида (0) Санаи нашр: 30.04.2021 №: 87 Мутолиа карданд: 884
