Зодаи шаҳри Конибодом Эргаш Шарипов аз ҷумлаи сарсупурдагони Ватани маҳбуб аст, ки дар кишвари дурдасти Чехословакия (ҳоло Чехия) намунаи олии қаҳрамониро аз худ нишон дод. Пас аз хатми омӯзишгоҳи артиллерии шаҳри Красноярск, лейтенанти хурд Эргаш Шарипов ба фронт омада, фармондеҳи взводи оташфишонии ракетаи 75 мм батареяи 1 - уми артиллерии полки 387-уми Зволенски ордени Суворов ва Богдан Хмелнитскии армияи 40 - ум таъйин шуд. Дар муҳорибаҳо бар зидди истилогарони фашистӣ взводи ӯ яке аз аввалинҳо шуда ба шаҳри Банска - Бистритса ворид шуд ва он ҷо тавонист ҳаракати минбаъдаи пиёдагардонро таъмин намояд. 

 

Дар ин муҳориба худи Эргаш Шарипов ҷароҳат бардошт ва то даме, ки шаҳр пурра аз душман озод карда шуд, дар қатор монд. Рӯзҳои 21 - 22 апрели соли 1944, дар шимолу ғарби деҳаи Страни, душман пайваста зидди ҳамлаҳои воҳидҳои оташфишонии Шарипов муқобилият нишон дод. Сарбозони ҷасури ӯ талаф ёфтанд. Сипас, Шарипов шахсан ба ҷилави силоҳи артилерӣ нишаста, 30 фашисти хунхорро бо зарбаҳои оташфишон нобуд кард. Ҳамлаи навбатии душман боздошта шуд. Взводи Шарипов дар як муддати кӯтоҳ аз маҳаллаи Зволен то Учерск Брод 6 тӯпи худрави артиллерии душманро хароб намуд. 

Дар муҳориба дар қисмати шимоли шаҳри Учерска Броди Чехия, Шарипов ҷароҳати вазнин бардошт, аммо аз ҳамсангаронаш хост, то замони баргардондани ҳамлаи душман ӯро эвакуатсия накунанд. Вай ба сарбозоне, ки мехостанд ӯро аз майдони ҷанг берун баранд, гуфт: «Не, ман ҳанӯз зинда ҳастам ва пеши ман савганд ёд кунед, ки шумо ин мавқеъро нигоҳ медоред ва аз фашистон барои ман интиқом мегиред».

Ҳамон марде, ки аз тири аду дорад ҷароҳатҳо,

Вале чашмони гирёнаш намебинам, 

                                                            ватандорист!

Ҳангоми пешниҳод намудани номзадии ӯ ба унвони Қаҳрамони Иттиҳоди Шӯравӣ, фармондеҳи полки гвардиягии артиллерӣ подполковник Муравёв ҳамчун тавсифнома чунин навиштааст: «Лейтенанти хурд Эргаш Шарипов дар набардҳои зидди истилогарони фашистӣ далерӣ, ҷасорат ва қаҳрамонӣ нишон дод».

Ба ин писари шарафманди халқи тоҷик бо фармони Президиуми Шӯрои Олии ИҶШС аз 15 майи соли 1946 баъд аз марг унвони Қаҳрамони Иттиҳоди Шӯравӣ дода шуд.

Ҷанги Бузурги Ватаниро, ки аз калонтарин муҳорибаҳои Ҷанги дуюми ҷаҳонист, таърихшиносон барҳақ вазнинтарин ва мушкилтарин имтиҳони инсоният дар асри ХХ донистаанд. Дар он беш аз 70 давлати хурду бузург иштирок карда, набардҳои хунин ва амалиётҳои ҷангӣ дар 40 давлат сурат гирифтанд. Талафоти умумии инсоният ба 55 миллион нафар расид. Хароҷоти ҳарбӣ ва зарари умумии ҷанг 4,5 триллион доллари амрикоиро ташкил дод.

Аз ин рӯ, дар рафти тадриси фанҳои таърихи умумӣ ва таърихи халқи тоҷик ба таври ҷудогона ва алоҳида омӯхтани ин воқеаи бузурги таърихӣ айни муддаост, зеро рӯзгори осудаи имрӯз ба ивази ҷоннисориҳои шаҳидони Ватан ба бор омадааст. Ҳамчунин, қадри осоиштагиву оромӣ ва озодиву истиқлоли кишварамон ба ягон ганҷу хазинаи ҷаҳон баробар нест.

 

Гулшан МАМАДҚУЛОВА,

омӯзгори гимназияи «Кафолат»