19 май дар Қасри миллат Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон роҳбарони ҳайатҳо - иштирокчиёни ҷаласаи Шӯрои вазирони корҳои хориҷии давлатҳои аъзои Созмони Аҳдномаи амнияти дастҷамъиро ба ҳузур пазируфтанд.

Дар мулоқот рафти иҷрои Нақшаи чорабиниҳо оид ба татбиқи қарорҳои ҷаласаи Шӯрои амнияти дастҷамъӣ ва афзалиятҳои раёсати ҷониби Тоҷикистон дар Созмони Аҳдномаи амнияти дастҷамъӣ (СААД) мавриди баррасӣ қарор гирифтанд.

Дар зимн, аз ҷумла ҷаласаҳои Шӯрои вазирони мудофиа ва Кумитаи котибони шӯроҳои амнияти кишварҳои аъзои Созмони Аҳдномаи амнияти дастҷамъӣ, ки моҳи апрели соли равон дар шаҳри Душанбе баргузор шуданд, зикр гаштанд.

Президенти мамлакат муҳтарам Эмомалӣ Раҳмон таъкид доштанд, ки Тоҷикистон дар давраи раёсат дар Созмони Аҳдномаи амнияти дастҷамъӣ мутобиқи афзалиятҳои муайяншуда, вазифаҳои раёсатро бо ҷонибдории кишварҳои аъзои созмон ба таври пурсамар иҷро карда истодааст.

Таъкид гардид, ки фаъолияти созмон дар давраи гузашта ҳамаҷониба таҳлил гашта, Стратегияи рушди Созмони Аҳдномаи амнияти дастҷамъӣ то соли 2025 бо назардошти муайян кардани вазифаҳои афзалиятнок барои оянда таҳия гардад.

Дар рафти суҳбат масъалаҳои ҳамкории кишварҳо дар доираи Созмони Аҳдномаи амнияти дастҷамъӣ, аз ҷумла таъмини амнияти минтақа, амалисозии барномаҳои созмон оид ба таҳкими иқтидори ҳифзи марзи Тоҷикистону Афғонистон, муборизаи дастҷамъона бар зидди таҳдиду хатарҳои ҷомеаи ҷаҳонӣ, аз қабили терроризму экстремизм, ҷиноятҳои муташаккили трансмиллӣ, бахусус гардиши ғайриқонунии маводи нашъаовар, муҳокима гардиданд.

Дар охири вохӯрӣ Президенти мамлакат муҳтарам Эмомалӣ Раҳмон ба кори ҷаласаи Шӯрои вазирони корҳои хориҷии давлатҳои аъзои Созмони Аҳдномаи амнияти дастҷамъӣ комёбӣ орзу карда, изҳори умед намуданд, ки натиҷаҳои ҷаласаи имрӯзаи он барои расидан ба ҳадафҳои дарпешистода, пурсамар хоҳад буд.