Амсилаи Регистони Самарқанд, лаъли бо нақшу нигори шарқӣ ороишёфта ва кандакориҳо дар чӯб, ки аз ҷониби Роҳбарони олии Ҷумҳурии Ӯзбекистон ба Президенти Ҷумҳурии Тоҷикистон муҳтарам Эмомалӣ Раҳмон туҳфа гардидаанд, имрӯзҳо диққати бештари тамошогарони намоиши «Тоҷикистон – Ӯзбекистон: дар масири дӯстӣ ва созандагӣ» - ро ҷалб менамоянд. 

Намоиши мазкур бахшида ба сафари расмии  Президенти Ҷумҳурии Ӯзбекистон муҳтарам Шакват Мирзиёев ба Ҷумҳурии Тоҷикистон 9 июни соли равон дар Осорхонаи миллии Тоҷикистон бо иштироки намояндагони вазорату идораҳо ва сафорати Ҷумҳурии Ӯзбекистон дар Тоҷикистон баргузор гардид. 

Дар чорабинӣ қайд гардид, ки раванди дӯстиву бародарии мо дар давраи ба истиқлолу озодӣ расидани Тоҷикистону Ӯзбекистон ба сатҳи сифатан нав баромад. Тоҷикистон ва Ӯзбекистон кишварҳое мебошанд, ки на танҳо аз рӯи мавқеи ҷуғрофӣ, балки таърихан низ ҳамқисматанд. Миёни тоҷикону ӯзбекон умумиятҳои зиёде вуҷуд дорад. Тақдири умумии таърихӣ, дину оинҳои ягона, арзишҳои фарҳангии муштарак, урфу одатҳо, пухтупаз, сарулибос,  анъанаҳо, ҳатто дар мусиқӣ низ ягонаанд.  

Дар таҳкими раванди дӯстӣ миёни ин ду ҳамсоякишвар ва миллатҳои ба ҳам бародар саҳми роҳбарони ду кишвар - Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Президенти Ҷумҳурии Ӯзбекистон муҳтарам Шавкат Мирзиёев хеле бузург аст. Бинобар ин, дар оғози намоиш  тавассути аксҳо дастовардҳои  солҳои охир бадастомада дар ин самт муаррифӣ гардиданд. 

Меҳмонон як қатор экспонатҳои нодир, аз қабилӣ мусаввараву нимпайкара, китобу аксҳо, гулдону арғумонҳо, қолинҳои дастбоф бо акси Абдураҳмонӣ Ҷомӣ ва Алишери Навоӣ, ки аз дастовардҳои ин ду халқи таърихӣ дар масири дӯстӣ ва созандагӣ қисса мекунанд, дидан намуданд. 

Ҳамзамон, мавзеъҳои таърихии Тоҷикистону Ӯзбекистон тавассути мусаввара ва китобу маҷаллаҳо тарғиб гардида, дар маркази намоиш пайкараи дӯстон – намояндагони адабиёти ин ду миллат, устоду шогирд Мавлоно Абдураҳмони Ҷомӣ ва Алишери Навоӣ гузошта шудааст.  Робитаҳое, ки ин ду халқи ба ҳам дӯсту бародарро боз ҳам қаринтар месозанд, дар ҳоли густариш ҳастанд. Таъсиси марказҳои фарҳанги миллӣ дар Душанбе ва Тошканду муассисаҳои таълимӣ, нашри рӯзномаҳо бо ду забон, ташрифи намояндагони кишварҳо, ташкили сафарҳои эҷодӣ, рӯзҳои фарҳангӣ, намоиш ва конфронсҳо аз ин қабиланд. Тамошогарон  метавонанд то 20 июн аз намоиш баҳраманд шаванд. 

 

Лола РИЗОӢ, «Ҷумҳурият»