Дар Суди Олӣ мақолаи шаҳрванд Ҳусейн Давлатов бо номи «Кай ҳақ ба ҳақдор мерасад?», ки дар рӯзномаи «Ҷумҳурият»  20 апрели соли 2021, № 78, нашр гардидааст, мавриди омӯзиш қарор дода шуд.

Муайян гардид, ки дар асоси аризаи даъвогии Ҳусейн Давлатов бо ҷавобгарии Шавқатҷон Гулов ва Фараҳнуши Кулизода, шахсони сеюм Абдуҷалол Шокиров ва Хадамоти иҷро дар ноҳияи Исмоили Сомонӣ дар бораи кӯчондан аз манзили истиқоматӣ бе додани манзили дигар дар суди ноҳияи Исмоили Сомонии шаҳри Душанбе парвандаи гражданӣ оғоз гардида, мавриди баррасӣ қарор дорад.

Бо таъйиноти маҷлиси судӣ аз 28 апрели соли 2021 дар асоси дархости даъвогар Ҳ. Давлатов экспертизаи судӣ - хатшиносӣ таъйин гардида, баррасии парванда боздошта шудааст.

Мутобиқи талаботи моддаи 17 Кодекси мурофиаи граждании Ҷумҳурии Тоҷикистон ҳамаи масъалаҳое, ки ҳангоми муҳокимаи парванда дар суди марҳилаи якум ба миён меоянд, аз ҷониби судя ҳал мегарданд.

Аз ин рӯ, тарафҳо ва дигар шахсони иштирокчии парванда метавонанд вобаста ба ҳолатҳои кор ваҷҳу далелҳои худро ба суд пешниҳод намоянд.

 

А. ИСҲОҚӢ, муовини раиси Суди Олӣ