Прокуратураи шаҳри Хуҷанд мақолаи рӯзноманигор Лашкар Шарифзода зери сарлавҳаи “Баҳси алимент. Судшаванда бо ҳукми сафед аз толор берун шуд”-ро, ки дар рӯзномаи “Ҷумҳурият” таҳти № 230,  аз 30. 11. 2020 ба табъ расидааст, мавриди баррасӣ қарор дод.

 

Дар мақола сухан дар бораи аз тарафи суди шаҳри Хуҷанд сафед шудани судшаванда Баҳром Атохуҷаев бо моддаи 177 қисми 1 Кодекси ҷиноятӣ рафта, зикр шудааст, ки  мақомоти тафтиши пешакӣ ҳолатҳои корро нодуруст муайян карда, нисбат ба охирон беасос дар содир кардани ҷинояти қасдан саркашӣ намудан аз пардохти алимент айб эълон карда,  дар ҷараёни муҳокимаи судӣ гунаҳкор будани ӯ бо маҷмӯи далелҳои эътимоднок тасдиқ нагардидааст. 

Дар асл бошад, Б. Атохуҷаев бо мақсади кам супурдани маблағи алимент, ки бояд тибқи ҳалномаи суди шаҳри Хуҷанд аз 27. 02. 2017 барои таъминоти фарзанди ноболиғаш М. Атохуҷаева ба манфиати собиқ ҳамсараш М. Фозилова равона шудааст, қасдан нақшаи ҷинояткоронаи худро барои сохтакории ҳуҷҷати расмии аз уҳдадорӣ озодкунандаро таҳрезӣ намуда, бо мусоидати шахсони масъули  маркази равонпизишкии вилояти Суғд оид ба ҳаҷми ками маош маълумотномаи бардурӯғ гирифта, ба мақомоти таъқиби ҷиноят пешниҳод намудааст. Дар натиҷаи кирдорҳои ҷинояткоронааш Б. Атохуҷаев ҳуқуқу манфиатҳои фарзанди ноболиғи худро, ки ба таъминотпулӣ эҳтиёҷи зиёд дошт, дағалона поймол карда, аз ин ҳисоб қарзи алимент ба 9061 сомонӣ расидааст.

Аз ин рӯ, прокуратураи шаҳри Хуҷанд ба санади баръало ғайриқонунии суд дар хусуси сафед кардани Б. Атохуҷаев розӣ нашуда, ба он эътирози кассатсионӣ овард. Дар натиҷа санади ғайриқонунӣ бекор гардида, парвандаи ҷиноятӣ нисбат ба Б. Атохуҷаев бо аломатҳои моддаҳои 177 қисми 1 ва 340 қисми 2 бандҳои “б, в” Кодекси ҷиноятӣ дар муҳокимаи нави судӣ баррасӣ гардида, ба ӯ аз рӯи маҷмӯи ҷиноятҳо ҷазои ниҳоӣ дар намуди маҳрум сохтан аз озодӣ ба муҳлати 2 солу 2 моҳ таъйин шуд. 

Ҳамзамон, муайян гардид, ки номбурда бо ҳукми суди шаҳри Хуҷанд аз 20.10.2020 бо моддаи 324 қисми 2 банди “а” Кодекси ҷиноятӣ низ маҳкум шуда, ба ӯ ҷазо дар намуди маҳрум сохтан аз озодӣ ба муҳлати 2 сол бо адо намудани ҷазо дар муассисаҳои ислоҳии дорои низоми умумӣ таъйин гардидааст.

Бинобар ин, ба Б. Атохуҷаев бо дастрасии моддаҳои 67, 69 Кодекси ҷиноятӣ ҷазои бо ҳукми нав таъйингардидаро зам намуда, ба ӯ ҷазои ниҳоӣ дар намуди маҳрум сохтан аз озодӣ ба муҳлати 2 солу 4 моҳ бо адо намудани ҷазо дар муассисаҳои ислоҳии дорои низоми умумӣ таъйин карда шуд.

 

А. НАЗАРЗОДА, 

прокурори шаҳри Хуҷанд