ТОҶИКДУХТАР СОҲИБИ ҶОИЗАИ БА НОМИ АЛЕКСАНДР ЕЖЕВСКИЙ

Нигора Мирова, донишҷӯи Донишгоҳи аграрии Урали Ҷанубӣ тухмипошии пневматикиеро ихтироъ намуд, ки кишт ва ҷамъоварии ҳосилро ба маротиб осон менамояд. Дар ин бора сомонаи Sputnik.tj  хабар додааст. 

Ба иттилои сомона Нигора барои ин ихтирои техникӣ бо Ҷоизаи миллии ба номи Александр Ежевскийи Федератсияи Россия, ки барои рушди техникаи кишоварзии ватанӣ нигаронда шудааст, қадр гардид.

Гуфта мешавад, ки ихтирои Н. Мирова писанди истеҳсолкунандагон шуда, ӯро  барои кор ба заводи техникаи аграрии Самара ва барои идомаи таҳсил ба Москва даъват кардаанд. 

 

НАЗДИКШАВИИ АСТЕРОИДИ ХАТАРНОК БА ЗАМИН

11 июл астероиди 2020  WU5,  ки  ба гурӯҳи астероидҳои эҳтимолан хатарнок шомил аст, ба Замин дар масофаи 24 миллион километр наздик меояд. Дар ин бора аз Институти астрофизикаи назди Академияи миллии илмҳо ба мо иттилоъ доданд.

Астероиди мазкурро олимон моҳи ноябри соли 2020 кашф намуданд. Муайян гардид, ки андозаи он тахминан 1 километр мебошад. Бо назардошти андоза ва наздикшавӣ ба Замин, ҷирми кайҳониро олимон ба гурӯҳи астероидҳои ба Замин хатарнок шомил намуданд.  

Зимнан, бояд ёдовар шуд, ки шоми 13 - 14 январи соли равон  астероиди 2020  WU5 ба Замин наздик омада буд. Ин лаҳза масофаи Замин ва астероид 8.1 миллион километрро ташкил дод, ки дар ин ҳолат бархӯрди он ба Замин ғайриимкон аст.

 

ОЛИМОНИ РУС ТЕХНОЛОГИЯИ САБТИ ХОБРО КАШФ НАМУДАНД

Олимони Россия гӯшмони нейрониеро офариданд, ки бо истифода аз он метавон хоби дидаи инсонро сабт ва баъдан барқарор намуд. 

Коршиносон ҳанӯз соли 2019 бори аввал  ба барқарор намудани тасвирҳое, ки ҳангоми хоб дар майнаи сари инсон пайдо мешавад, оғоз намуда, дар ин самт озмоиш гузаронда буданд. Ба ширкаткунандагони озмоиш наворҳои гуногун  нишон дода, дар ЭЭГ (ЭЭГ- фаъолнокии электрикии майнаи сарро меомӯзад) сабт намуданд. Тасвирҳои сабтшуда 90 дарсад дуруст баромаданд.

Интизор меравад, ки  гӯшмонҳо то соли 2025 ба фурӯш бароварда шуда, мавриди истифодаи умум қарор мегиранд.  

 

Фарзона ФАЙЗАЛӢ,  “Ҷумҳурият”