Хабарҳо
«ДАР СУҲБАТИ ЛОИҚ»
Чунин ном дорад китобе, ки чанде пеш дар шаҳри Хуҷанд ба ифтихори 80-умин солгарди Шоири халқии Тоҷикистон Лоиқ Шералӣ интишор ёфт. Он бори аввал мусоҳибаҳои шоирро бо журналистони дохилу хориҷи кишвар дар солҳои гуногун фаро мегирад.
Мураттиби китоб Боҳир Раҷабов, номзади илми филология, тазаккур додааст, ки мусоҳибаҳо ба ҷуз аз масоили шеъру адаб, нақду суханшиносӣ, ҳамчунин, масъалаҳои муҳимтарини сиёсат, иҷтимоъ ва фарҳанги замони Лоиқ Шералиро матраҳ мекунад.
Мураттиби китоб нақди адабӣ будани меҳвари муколамаҳоро махсус таъкид карда, менависад: «Дар мусоҳибаҳо даҳҳо масъалаи ҳаётан муҳими адабиёт ва нақди адабӣ фароҳам омадааст, ки барои баровардани хулосаи саҳеҳ аз дунёи воқеии адиб, олами рангини ботини эҷодкор, шеваҳои нақд ва интиқод дар суҳбатҳои хоси адабӣ арзишманданд».
Ҷамъоварии мусоҳибаҳои Лоиқ Шералиро профессор Усмонҷон Ғаффоров оғоз карда, рӯйхати суҳбатҳои шоирро низ тартиб додааст. Аксари интервюҳо бори аввал аз радиову телевизион, аз шабакаҳои иҷтимоӣ ва дигар сарчашмаҳо вориди китоби «Дар суҳбати Лоиқ» шуданд. Ҳамзамон, ду мусоҳибаи донишмандону суханварони Арманистон ва Эрон низ бо шоир дар маҷмӯа омадаанд.
Ҳамчунин, ду муҳовараи Лоиқ Шералӣ, ки яке соли 1988 ва дигаре соли 1989 дар рӯзномаи «Ҷумҳурият» (он замон «Тоҷикистони советӣ») интишор ёфтаву масъалаҳои худшиносӣ ва забони тоҷикии порсиро баррасӣ мекунанд, дар китоб ҷо дода шудаанд.
Ёдовар мешавем, ки Боҳир Раҷабов чанд сол пеш рисолаи номзадиашро дар мавзӯи «Публитсистикаи адабӣ - танқидии Лоиқ Шералӣ» дифоъ кард ва китоб давоми корҳои илмиву ҷустуҷӯии ӯст.
Бузургмеҳри БАҲОДУР, «Ҷумҳурият»
Баёни ақида (0) Санаи нашр: №: Мутолиа карданд: 1366