Хабарҳо
«Толибон» гузаргоҳи асосии марзи Афғонистону Тоҷикистонро тасарруф намуданд
Газета. Ру. Ҷангиёни ҳаракати ифротии «Толибон» гузаргоҳи асосии сарҳадии байни Афғонистону Тоҷикистон – бандари Шерхонро дар вилояти Кундуз зери тасарруфи худ дароварданд,- хабар медиҳад шабакаи телевизионии Al Jazeera.
«Дирӯз, пас аз як соати муҳориба «Толибон» бандари Шерхон, шаҳр ва ҳамаи посгоҳҳои сарҳадӣ бо Тоҷикистонро забт намуданд», - изҳор дошт Халиддин Ҳакимӣ, узви шӯрои вилоят.
Ин иттилоъро яке аз намояндагони «Толибон» низ таъйид намуд. Тибқи хабари шабакаи мазкур, баъзе аз хизматчиёни неруҳои амниятии Афғонистон посгоҳҳои худро тарк ва тариқи марз фирор карданд.
СҶТ штамми коронавируси ҳиндиро марговартарин хонд
CentralAsia (CA). – Созмони ҷаҳонии тандурустӣ изҳор намуд, ки шакли нави коронавирус – штамми ҳиндӣ, ки онро «варианти делта» низ мегӯянд, зудтаъсир мебошад. Он барои нафарони нотавону заиф ва, алалхусус, дар маҳалҳое, ки сатҳи эмкунии зидди коронавирус паст аст, хатарнок дониста мешавад, - менигорад CNBC.
Бино ба ақидаи намояндаи СҶТ Майк Райан, «шакли делта» бештар марговар буда, аз одам ба одам зуд мегузарад ва, билохира, ашхоси заифро мубталои худ мегардонад.
Райан гуфт, ки роҳбарони кишварҳои пешрафтаи ҷаҳон ва намояндагони ҷамъиятҳои тандурустӣ аз ҳисоби хайрияву паҳн кардани ваксинаи зидди коронавирус метавонанд барои ҳифзи саломатии чунин одамон ёрӣ расонанд.
Гуфтугӯи телефонии Путин бо Президенти Куба
Газета. Ру. Бо ташаббуси ҷониби Куба гуфтугӯи телефонии Президенти Россия Владимир Путин ва Президенти Куба Мигел Диас-Канел Бермудес баргузор гардид,- хабар медиҳад хадамоти матбуоти Кремл.
Бино ба гуфтаи Диас-Канел Бермудес, ИҶШС дар ғалаба бар фашизм саҳми бориз гузошт ва Куба қаҳрамониҳои шаҳрвандони шӯравиро пос медорад.
Туркия ваксина бар зидди коронавирус офарид
Лента. ру. Президенти Туркия Раҷаб Тайип Эрдоган оид ба кашфи аввалин ваксинаи ватанӣ бар зидди коронавирус бо номи Turkovac эълом дошт, - хабар медиҳад агентии хабарии Anadolu.
Ваксина марҳилаи сеюми озмоиши клиникиро мегузарад.
Аз рафти эмгузаронӣ Президенти кишвар Раҷаб Тайип Эрдоган тариқи алоқаи видеоӣ назорат мекард. Ӯ сарфи назар аз хориҷи мамлакат ворид шудани мавод, муҳимияти мавҷуд будани ваксинаи худиро таъкид дошт.
Баёни ақида (0) Санаи нашр: №: Мутолиа карданд: 1044