Таҳти раёсати Сарвазири мамлакат Қоҳир Расулзода ҷаласаи навбатии Ситоди ҷумҳуриявӣ оид ба пурзӯр намудани чораҳои зиддиэпидемиявӣ ва пешгирӣ аз интиқолу паҳншавии бемории сироятии  COVID – 19 дар Ҷумҳурии Тоҷикистон баргузор гашт.

Дар ҷаласа вазъи имрӯзаи кишвар, минтақа ва ҷаҳон, захира ва нигоҳдории доруворию маҳлулҳои безараргардонӣ, пурзӯр кардани тадбирҳо ҷиҳати баланд бардоштани сатҳи хизматрасонии тиббӣ ва ҳамкории мутақобилаи сохторҳои аъзои ситод ва дигар масъалаҳои мубрами рӯз мавриди таҳлилу баррасӣ қарор гирифтанд.

Ситоди ҷумҳуриявӣ ба таваҷҷуҳи шаҳрвандон мерасонад, ки дар муассисаҳои тандурустии мамлакат ҳолатҳои гирифтор шудан ба бемории сироятии коронавирус ба қайд гирифта шуданд.

Омили асосии хуруҷи навбатии бемориро мутахассисон дар бетаваҷҷуҳӣ, риоя накардани муҳлати муқарраргардида барои худмуҳофизатии шаҳрвандони мамлакат, ки аз хориҷи кишвар баргашта буданд, истифода накардани ниқоб ва дигар тавсияҳо арзёбӣ мекунанд.

Вобаста ба ин, аз ҳар як сокини мамлакат риоя намудани тавсияи мутахассисони соҳа, бе зарурат гаштугузор накардан, истифодаи ниқоб дар ҷойҳои ҷамъиятӣ ва маводҳои безараргардонӣ талаб карда мешавад.

Бори дигар ба таваҷҷуҳи шаҳрвандон расонда мешавад, ки танҳо бо роҳи риояи тавсияҳои мутахассисони соҳаи тиб ва ҷонибдории сокинони мамлакат аз тадбирҳои ситоди ҷумҳуриявӣ  метавон аз сироятёбӣ ба дилхоҳ беморӣ наҷот ёфт.

Тавре таъкид рафт, бо сабаби хуруҷи навбатии бемории сироятии коронавирус дар як қатор кишварҳои ҷаҳон бори дигар фаъолияти марказҳои хизматрасонӣ, баргузории ҷашну маросим, боғу гулгашт ва маконҳое, ки дар он ҷо пайваста одамони зиёд ҷамъ мегарданд,  қатъ шуданд.

Вобаста ба ин, Ситоди ҷумҳуриявӣ оид ба пурзӯр намудани чораҳои зиддиэпидемиявӣ ва пешгирӣ аз интиқолу паҳншавии бемории сироятии COVID – 19 дар Ҷумҳурии Тоҷикистон қарорҳои дахлдор, аз ҷумла  пурзӯр намудани ҳамоҳангии  фаъолияти вазорату идораҳои дахлдор дар самти назорати риояи қоидаҳои гигиенаи шахсӣ ва ҷамъиятӣ аз ҷониби сокинон, назорати марказҳои хизматрасонию фарҳангӣ,  андешидани чораҳои қатъии пешгирикунанда,  риояи қоидаҳои санитарию гигиенӣ ҳангоми гузарондани тӯй, маъракаҳо ва маросими дафн, ҳамчунин, бо мақсади пешгирии паҳншавии  беморӣ чораҳои зарурӣ ҳангоми анҷом додани парвозҳои байналмилалиро қабул намуд.

 

 

ТОҶИКИСТОН ВА ҚАТАР.  Ҳамкорӣ дар соҳаи варзиш густариш меёбад

Дар шаҳри Душанбе миёни Федератсияи футболи Тоҷикистон (ФФТ) ва Ассотсиатсияи футболи Қатар (АФҚ) созишномаи ҳамкорӣ ба имзо расид, - хабар доданд аз ФФТ.

 

Санадро президенти ФФТ Рустами Эмомалӣ ва президенти АФҚ шайх Ҳамад ибни Халифа ибни Аҳмад ат-Танӣ имзо карданд.

Рустами Эмомалӣ меҳмони олиқадрро ба пойтахти кишвар – шаҳри Душанбе хайрамақдам гуфта, аз муносиботи Тоҷикистону Қатар дар соҳаи варзиш ва дигар самтҳо изҳори қаноатмандӣ намуд. 

Дар ҷараёни суҳбат масъалаҳои ҳамкорӣ ва табодули таҷриба миёни созмонҳои футболи ду кишвар баррасӣ шуданд. Ҷонибҳо ба мувофиқа расиданд, ки фаъолияти худро барои ташкил ва гузарондани бозиҳои рафиқона миёни дастаҳои мунтахаби мардон, бонувон, ҷавонон ва футзали ҳар ду кишвар ҳамоҳанг намоянд.

Ҳамчунин, таҳияи барномаи такмили ихтисоси мураббиён, рушди футболи бонувон ва оммавияти футбол, ҳамкорӣ дар самти маркетинг, тиб, доварӣ ва ғайра ба нақша гирифта шуд.