Матлабҳои озмунӣ ба ифтихори 110 - солагии Қаҳрамони Тоҷикистон, шоири оламшумулу маҳбубро чанд моҳ боз аз саҳифаҳои рӯзномаи дӯстдоштаам «Ҷумҳурият» мутолиа намудам. Ҳар кадом дар сатҳи баланд иншо шуда буд ва як паҳлуи кору зиндагии ин устоди забардастро дар бар мегирифт. Воқеан, ному шеъри Мирзо Турсунзода, то замоне ки забони тоҷикӣ арзи ҳастӣ мекунад, боқӣ мемонанд. Инчунин, хидматҳои содиқонаашро бо таҷлили ҷашнҳо баъдан ҳам халқи азизаш қадр мекунад.

Ба ростӣ, пас аз мутолиаи ин матлабҳо ба кору рӯзгори ин абармарди сиёсат ва шеъри миллат бештару беҳтар ошно гардидам. Ифтихор ҳам намудам, ки шоири кишвари мо чун сиёсатмадори сатҳи ҷаҳонӣ барои барқарорӣ ва пойдории сулҳ дар сайёра саҳми бориз гузоштааст.

Рӯзгору кори устоди равоншод барои мо, имрӯзиён ва фардоиён, беҳтарин дарси ибрат мебошад. Ин ҳақиқатро на танҳо мо – ҳамватанони шоир эътироф кардаву мекунем, балки бузургтарин шахсиятҳои сатҳи ҷаҳонӣ аз он гуфтаанду навиштаанд. Аз Нашрияи расмии Ҷумҳурии Тоҷикистон - рӯзномаи «Ҷумҳурият» сипосгузорӣ мекунам, ки ба мани омӯзгор ва шогирдонам маълумоти фаровон дар бораи шоиру сиёсатмадори ҷаҳонӣ фароҳам овард. Албатта, ман аз ин ҳама зимни гузаштани дарсҳоям ёдовар мешавам. Ҳатман ин иқдоми рӯзномаро бисёр шоиста арзёбӣ мекунам. Бешак, истифодаи бисёри рӯзномаҳо, ки дар онҳо ин гуна матлабҳо нашр шудаанд, мушкил мебошад. Аз ин рӯ, хосторам, ки ҳамаи матлабҳои бахшида ба кору рӯзгори Мирзо Турсунзода дар шакли китоби алоҳида ба табъ расанд. Дар поёни матлабҳо бояд рӯзу моҳу соли нашр навишта шаванд.

Одатан ин гуна китобҳоро бо теъдоди кам ба табъ мерасонанд, ки ҷойи афсӯс низ мебошад. Бисёр мехостам, ки бо ризоят ё худ ташаббуси «Ҷумҳурият» дар якҷоягӣ бо Вазорати маориф ва илми ҷумҳурӣ бо теъдоди зиёд ин китоб нашр бигардад ва ба муассисаҳои таҳсилоти миёнаи умумӣ ва миёнаву олии касбӣ тақсим бишавад. Ин китоб барои ҳар хонандаи муассисаҳои мазкур ва омӯзгоронашон муҳим мебошад. Махсусан, дар тарбияи ватандӯстӣ, боло бурдани ҳисси ифтихори миллӣ, хештаншиносӣ, шинохти ҳақиқат, ҳифзи истиқлолияти бадастомада мусоидат карда метавонад.

 

Фирӯза МИРЗОЕВА,

омӯзгори муассисаи таҳсилоти миёнаи умумии № 50, ноҳияи Сино