Хабарҳо
ТОҶИКИСТОН. МУҚОВИМАТ БА ТЕРРОРИЗМ ПУРЗӮР МЕГАРДАД
Вакилони Маҷлиси намояндагон дар ҷаласаи навбатӣ лоиҳаи Қонуни Ҷумҳурии Тоҷикистон «Дар бораи муқовимат ба терроризм»-ро ба тасвиб расонданд.
Шараф Каримзода, муовини вазири адлия, зимни баррасии лоиҳаи қонун иброз дошт, ки муқовимат ба терроризм таърихи қадима дошта, дар даҳсолаи охир он дар сатҳи байналмилалӣ мубрам гардидааст. Бинобар ин, Президенти Ҷумҳурии Тоҷикистон муҳтарам Эмомалӣ Раҳмон зимни ироаи Паёми навбатиашон зикр намуданд, ки дар замони муосир зарурати тақвияти заминаҳои ҳуқуқии муқовимат ба терроризм ҷой дорад. Бо ин мақсад, Вазорати адлия якҷоя бо Вазорати корҳои дохилӣ, Кумитаи давлатии амнияти миллӣ ва Прокуратураи генералӣ лоиҳаи Қонуни Ҷумҳурии Тоҷикистон «Дар бораи муқовимат ба терроризм»-ро таҳия намуданд.
Лоиҳа аз 12 боб ва 46 модда иборат буда, принсипҳои асосии муқовимат ба терроризм, асосҳои ҳуқуқию ташкилии пешгирии терроризм ва мубориза бо он, роҳу усулҳои бартараф намудани оқибатҳои амали террористиро бо мақсади таъмини бехатарии шахс, ҷамъияту давлат, инчунин, ҳифзи соҳибихтиёрӣ, тамомияти арзӣ ва амнияти кишварро муайян менамояд.
Гуфта шуд, ки дар лоиҳа муқаррароти нав вобаста ба муқовимати иттилоотию таблиғотӣ, аз ҷумла уҳдадориҳои воситаҳои ахбори омма, ҳимояи объектҳои таҳдиди террористӣ, муқовимат бар зидди маблағгузории фаъолияти террористӣ ва ҳамкориҳои байналмилалӣ бар муқобили терроризм, пешбинӣ шудааст.
Шоҳмурод Рустам, раиси кумитаи Маҷлиси намояндагон оид ба тартиботи ҳуқуқӣ, мудофиа ва амният, зикр кард, ки дар шароити ҷаҳонишавӣ терроризм ҳамчун як зуҳуроте аз гурӯҳи кирдорҳои алоҳидаи ҷиноятҳои ифротӣ бар муқобили шахс, ҷомеа ва давлат буда, воситаи ноилшавӣ ба мақсадҳои муғризонаи гурӯҳҳои миллатгаро, экстремистӣ ва ташкилоту ҳаракатҳои онҳо мубаддал гардидааст.
- Дар муқоиса аз қонуни амалкунандаи Ҷумҳурии Тоҷикистон «Дар бораи мубориза бар зидди терроризм», ки соли 1999 қабул шудааст, дар лоиҳаи пешниҳодшуда мавзӯи танзими он васеътар гардида, истифодаи системавӣ ва маҷмӯи чораҳои сиёсӣ, иттилоотию таблиғотӣ, иҷтимоию иқтисодӣ, ҳуқуқӣ ва тадбирҳои дигари муқовимат ба терроризм танзими қонунии худро ёфтаанд, - иброз дошт Ш. Рустам.
Маҳмуд МИРЗОЁН, «Ҷумҳурият»
Баёни ақида (0) Санаи нашр: №: Мутолиа карданд: 679