Бо иштироки табибони оилавии  маркази саломатии шаҳрии № 2 – и шаҳри Душанбе семинар – омӯзиш ҷиҳати кумак ва дастгирии беморони саратон  доир гардид. Дар рафти семинар – омӯзиш мутахассисон доир ба пешгирӣ ва табобати саривақтии бемории саратон ва дастгирии калонсолон ҳангоми гирифторӣ ба ин беморӣ суҳбату  маслиҳатҳои судманд доданд. 

 

-  Мутаассифона, дар дунё то ба ҳол табобати пурраи бемории саратонро пайдо накардаанд, вале, барои пешгирӣ аз ин навъи беморӣ, роҳҳои махсусро истифода намудан мумкин аст. Пеш аз ҳама, ин ба худи шахс вобастагӣ дорад. Зикр намудан ба маврид аст, ки бештар вақт   шахсони аз 65-сола боло гирифтори ин  беморӣ мешаванд. Бинобар ин, 80 дарсади беморонро калонсолон ташкил медиҳанд. Ин намуди касал ду навъ дошта, якумаш умри кӯтоҳу дуюмӣ умри тӯлонӣ дорад, - иброз дошт Фирӯза Абдуллоева, роҳбари ташкилоти ҷамъиятии «Авесто».

Боиси таассуф аст, ки аксар вақт аз муносибати нодурусти табибон ва шахсоне, ки ба аёдати беморон меоянд ва ё нигоҳубини онҳоро бар дӯш доранд, он авҷ гирифта, ҳатто, ба марг оварда мерасонад. Аслан, тамоми бемориҳо аз тарзи нодуруст  истифода бурдани ғизо ва пайваста асабонӣ будан сар мезанад. Сабаби ба бемории саратон гирифтор шудани одамонро мутахассисон ба номуътадилии фаъолияти системаи асаб ва танҳоӣ рабт медиҳанд. Саратон бемории сироятнашаванда аст. Биноан, мо бояд  аз ин беморон  дурӣ наҷӯем,  балки ба онҳо дасти мадад дароз намоем.   Зикр намудан ба маврид аст, ки мувофиқи илми тиб ҳар нафар, бахусус ашхоси калонсол,  дар муҳлатҳои муайян бояд аз озмоишгоҳи саратоншиносӣ гузашта, худро аз гирифторӣ ба ин беморӣ пешгирӣ намояд. 

«Ман ҳамчун  табиби соҳибтаҷриба аз Вазорати маориф ва илми Тоҷикистон хоҳиш менамоям, ки дар муассисаҳои таҳсилоти миёнаи умумӣ дарсҳои махсуси омӯзиши тиб ҷорӣ намоянд то наврасон тавонанд дар вақтҳои зарурӣ ва то  омадани табибон ба бемор  ёрии аввалияро расонанд», - гуфт Ф. Абдуллоева. 

 

Гулнисои САЪДОНШО, «Ҷумҳурият»