Сохторҳои тандурустии шаҳри Душанбе вазифадор шуданд, ки маъракаи эмгузаронии пурраи сокинони шаҳрро бар зидди бемории сироятии COVID-19 пурзӯр намуда, барои омодагӣ ва таъминоти беморхонаҳо бо доруворӣ ва таҷҳизоти зарурӣ тадбирҳои муассир андешанд. Ҳамчунин, сохторҳои дахлдори шаҳр муваззаф гардиданд, ки дар ҳамоҳангӣ ҷиҳати аз ташхис гузарондан ва  ба карантин фаро гирифтани шахсоне, ки аз хориҷа ба ҷумҳурӣ ворид мегарданд, чораҳои амалӣ андешида, дар ҳамкорӣ  бо  корхонаҳо  ҳаҷми  истеҳсоли  маводи безараргардониву беҳдоштиро афзун намоянд.

Чунин дастур дод Раиси Маҷлиси миллии Маҷлиси Олии Ҷумҳурии Тоҷикистон, раиси шаҳри Душанбе Рустами Эмомалӣ дар ҷаласаи корӣ, ки бо иштироки муовинони раиси шаҳр, раисони ноҳияҳои пойтахт, сохторҳои дахлдор ва мақомоти ҳифзи ҳуқуқи шаҳр, инчунин, роҳбарони аввали бархе мақомоти марказии ҳокимияти давлатӣ доир гардид.

Рустами  Эмомалӣ  ба роҳбарони ниҳодҳои дахлдор супориш дод, ки  бо ба роҳ мондани гардиши хона ба хона баҳри амалӣ намудани корҳои фаҳмондадиҳӣ ва эмгузаронӣ миёни сокинону меҳмонони пойтахт, бахусус дар муассисаҳои томактабӣ, тандурустӣ, боғҳои фарҳангу фароғатӣ, театр, кинотеатр, марказҳои савдо, бозорҳои истеъмолӣ, тарабхонаҳо, ошхонаҳо, қаҳвахонаҳо ва дигар ҷойҳои ҷамъиятӣ, ҳангоми гузарондани тӯю маъракаҳо чораҳои қатъиро амалӣ намуда, баҳри риояи меъёрҳои беҳдоштӣ, фосилаи иҷтимоӣ ва чораҳои безараргардонӣ, тадбирҳои судманд андешанд.