28 июн Президенти Ҷумҳурии Қирғизистон Садир Жапаров ҷиҳати анҷоми сафари расмии дурӯза ба Ҷумҳурии Тоҷикистон ташриф овард.

 

Дар Фурудгоҳи байналмилалии Душанбе сарвари Қирғизистонро  Сарвазири  Ҷумҳурии Тоҷикистон Қоҳир Расулзода ва дигар шахсони расмӣ пешвоз гирифтанд.

Ёдовар мешавем, ки дар доираи сафари расмии дурӯзаи Президенти Ҷумҳурии Қирғизистон Садир Жапаров ба Тоҷикистон мулоқоту музокироти сатҳи олӣ миёни Тоҷикистону Қирғизистон баргузор хоҳанд шуд.

28 июн дар доираи сафари расмии Президенти Ҷумҳурии Қирғизистон Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Сарвари Ҷумҳурии Қирғизистон Садир Жапаров бо мақсади шиносоӣ бо имкониятҳои рушди соҳаи сайёҳӣ ба бӯстонсаройи беруназшаҳрии “Баҳор”, воқеъ дар ноҳияи Варзоб, ташриф оварданд.

Дар қароргоҳи беруназшаҳрӣ сарварони давлатҳо табиати зебову нотакрор ва обҳои мусаффоро тамошо карданд.

Ҳадаф аз баргузор кардани сайругашти шомгоҳӣ, муаррифии мавзеъҳои зебову нотакрори кишвари биҳиштосоямон мебошад.