ДУШАНБЕ – МИЗБОНИ ҶАШНВОРАИ СҲШ

Аз 29 июн то 2 июли соли ҷорӣ дар шаҳри Душанбе Ҷашнвораи филмҳои бадеӣ ва телевизионии кишварҳои аъзои Созмони ҳамкории Шанхай баргузор мегардад.

Ҷашнвора ба 20 - умин солгарди таъсиси СҲШ бахшида шуда, дар он намоиши филмҳои 8 кишвари аъзо, чор кишвари нозир ва шаш давлати шарик дар назар аст.

Филмҳо аз тарафи доварони сатҳи байналмилалӣ баҳогузорӣ шуда, пирӯзшудагон бо ҷоизаҳои махсус, ҳамчунин, ғолиби мутлақ бо Шоҳҷоизаи ҷашнвора - «Парастуи тиллоӣ» қадр мешаванд.

 

КИТОБ ДАР БОРАИ ДУ ЧЕҲРАИ ДУРАХШОН

Китоби пажӯҳишгари варзида Абдухолиқи Набавӣ бо номи «Ду чеҳраи дурахшони адабиёти муосир» ба тозагӣ нашр шуд. Китоб мақолаҳоро дар бораи ду адиби номвари тоҷик - Мирзо Турсунзода ва Сотим Улуғзода фаро мегирад.

Дар он қисмати китоб, ки ба устод Мирзо Турсунзода ихтисос ёфтааст, бори нахуст мусоҳибаи Муҳаммад Осимӣ бо Чингиз Айтматов дар бораи Мирзо Турсунзода, мақолаи «Мирзое, ки ман мешинохтам» - и Борне Панкин ва таҳлили  либреттои «Тоҳир ва Зуҳра» -и шоир ҷой гирифтаанд.

Дар бораи устод Сотим Улуғзода ду мақолаи калонҳаҷми муаллиф дар бораи ибтикороти дар наср пиёдакардаи адиб ва таҳлили намоиши «Дар оташ» (1945) оварда шудаанд.

 

«ДАРАХТИ ДӮСТӢ»

Дар кинотеатри «Зебунисо» нахустнамоиши филми мустанади «Дарахти дӯстӣ» баргузор гардид. Филми мазкур ба сулҳу оштӣ ва собиқаи дӯстии халқҳои тоҷику қирғиз бахшида шуд.

Коргардони мустанади «Дарахти дӯстӣ» Дилошӯб Орифзода буда, ҳадафи филм бори дигар собит кардани ҷонибдори ҳаёти осоишта ва сулҳу ваҳдат будани мардуми одӣ, бавижа халқи тоҷик аст.

Бино ба гуфтаи коргардон, низоъҳои чанде пеш дар марзи Тоҷикистону Қирғизистон сарзада сабаби пайдоиши ғояи мусолиҳатомези филм шуданд.

 

Бузургмеҳри БАҲОДУР, «Ҷумҳурият»