Хабарҳо
БОХТАР. ДУ КӮЧА БА НОМИ ДУ АДИБ ГУЗОШТА ШУД
Маҷлиси вакилони халқи шаҳри Бохтар барои номгузории ду кӯча ба номи профессор Ҳасани Муродиён ва шоири ӯзбектабор Улмас Ҷамол қарор қабул кард. Барои номгузории кӯчаи “Ваҳдат-II” - и маҳаллаи “Истиқлол” ба номи Ҳасани Муродиён як гурӯҳ сокинон ва устодони ДДБ ба номи Носири Хурсав дархост пешниҳод карда, фаъолони маҳалла онро дастгирӣ ва ба комиссияи номгузории маҷлиси вакилони халқи шаҳр манзур карда буданд.
Наргис Қурбонзода, муовини раиси шаҳри Бохтар, дар ҷараёни иҷлосия доир ба ҳаёт ва фаъолияти Ҳасани Муродиён сухан ронда, аз ҷумла гуфт, ки устод муҳаққиқи адабиёти классикӣ ва муосири тоҷик, таърихи маориф ва давлатдории навини тоҷикон, саромӯзгор, рӯзноманигор, Аълочии маориф, матбуот ва фарҳанги Тоҷикистон, узви Иттифоқи журналистон, Конфедератсияи байналмилалии журналистон, доктори илмҳои филологӣ, профессор, Корманди шоистаи Тоҷикистон, ҷоизадори медали «Барои меҳнати шоён», умумииттифоқии ба номи Н. К. Крупская, “Муаллими методист”, “Олими сол – 2006”-и Донишгоҳи давлатии Бохтар ба номи Носири Хусрав, мартабадори ҷоизаҳои ба номи Ҷалолиддини Балхӣ дар бахши адабиётшиносӣ ва ба номи Соҳиб Табаров дар соҳаи адабиётшиносӣ ва нақди адабии мақомоти иҷроияи ҳокимияти давлатии вилояти Хатлон буда, муаллифи зиёда аз 30 рисолаи илмӣ (2 китоби чопнашуда), дастурҳои методӣ, омӯзномаҳо ва китобҳои дарсӣ, 220 мақолаи илмӣ ва таълимию методӣ мебошад. Бо роҳбарии Ҳасани Муродиён ду нафар рисолаи номзадӣ ва як нафар рисолаи докторӣ дифоъ карда, панҷ унвонҷӯ таҳқиқоти илмӣ мебурданд.
Зебуннисо Сатторзода, собиқадори меҳнат, устоди ДДБ ба номи Носири Хусрав, дар мавриди хидматҳои шоир Улмас Ҷамол гуфт, ки мавсуф яке аз дӯстдорони ин Меҳан буд ва дар миёни шуарои ӯзбек баъд аз Мир Алишер Навоӣ ягона нафарест, ки чор девон дорад.
Зокир ҲАСАН, “Ҷумҳурият”
Баёни ақида (0) Санаи нашр: №: Мутолиа карданд: 812