иҷтимоиёт
«ШАХСОНИ МАЪЮБИЯТДОШТА ДАР ОИНАИ ВАО». БАРРАСИИ ЧАНД МАСЪАЛАИ МУҲИМ
Дар Китобхонаи миллии Тоҷикистон барои журналистон барномаи омӯзишии «Шахсони маъюбиятдошта дар оинаи ВАО» баргузор гардид. Дар он намояндагон аз Иттиҳодияи миллии маъюбони Тоҷикистон ва мутахассисон аз Россия иштирок ва суханронӣ карданд. Ҳадафи барнома дуруст ва ҷавобгӯ ба нозукиҳои этикӣ инъикос намудани масъалаҳои одамони маъюбиятдошта, ҳифзи ҳуқуқу озодӣ ва фароҳам овардани шароити мусоид барои будубоши онҳо буд.
Дар раванди омӯзиши дурӯза ғамхориҳои давлату Ҳукумат, бавижа Пешвои миллат муҳтарам Эмомалӣ Раҳмон, нисбат ба ин қишри ҷомеа махсус зикр шуд. Таъкид гардид, ки дар асоси Паёми Сарвари давлат муҳтарам Эмомалӣ Раҳмон ба Маҷлиси Олӣ (26 январи соли 2021) нафақаи маъюбони аз синни кӯдакӣ ва маъюбони то 18 - сола, мувофиқи қонунҳои Ҷумҳурии Тоҷикистон “Дар бораи таъмини нафақаҳои шаҳрвандони Ҷумҳурии Тоҷикистон” ва “Дар бораи нафақаҳои суғуртавӣ ва давлатӣ” таъйин шудааст, инчунин, маъюбони гурӯҳи 1 - ум, ки ба онҳо тибқи Қонуни Ҷумҳурии Тоҷикистон “Дар бораи нафақаҳои суғуртавӣ ва давлатӣ” нафақа муқаррар гардидааст, аз 1 сентябри соли равон зиёд мегардад.
Бо хушнудӣ паём расонда шуд, ки низоми нави дохилшавӣ, яъне низоми тестӣ, ки бо дастгирии Сарвари давлат ба роҳ монда шуд, ба довталабони маъюбиятдошта имкон дод, ки бо ҷудо кардани холҳои муайяни иловагӣ дар муассисаҳои таҳсилоти олӣ ба омӯзишу таҳсил фаро гирифта шаванд. Омори солҳои охир нишон медиҳад, ки навад дарсади довталабони ин гурӯҳ дар ихтисосҳои гуногуни донишгоҳу донишкадаҳо ба таҳсил фаро гирифта шудаанд.
Ёдовар мешавем, ки ҳоло дар Тоҷикистон 153 ҳазор одами маъюбиятдошта зиндагӣ мекунад ва қисмати муайяни онҳо барои пешрафти соҳаҳои гуногун саҳми арзанда доранд.
Табиб ва мутахассиси кор бо одамони дорои имконияти ҷисмониашон маҳдуд Раъно Додоҷонова гуфт: «Имсол бори нахуст Барномаи даст-рас барои солҳои 2021-2025 қабул гардида, ба он маблағи муайян низ ҷудо шуд. Дастрас ба он маънист, ки сохтори биноҳо, роҳравҳо, истгоҳҳо, нақлиёти ҷамъиятӣ, иттилооти саҳеҳ, китобҳои махсус ва шароити таҳсил барои онҳо бояд бидуни монеаҳои табииву сунъӣ дастрас бошанд».
Олег Колпашников, табиб аз вилояти Екетеринбурги Федератсияи Россия, дар масъалаи фарогирии муаммоҳои одамони имконияти ҷисмониашон маҳдуд сухан ронда, аз ҷумла гуфт: «Ба андешаи мо, тартиб додани як гурӯҳи муайяни терминҳои соҳа зарур аст. Истилоҳҳо бояд фаҳмо, мухтасар ва замонавӣ бошанд. Ҳамзамон, дар вақти тарҷума аз забонҳои дигар, махсусан аз забони русӣ, эҳтиёт бояд шуд. Дар ин маврид, ҳамкории иттиҳодияи маъюбон бо забоншиносону донандагони соҳа ногузир аст».
Дар ҷамъбасти омӯзиш рӯзноманигорон дар кӯчаҳои марказии шаҳр ва нақлиёти ҷамъиятӣ дарсҳои «Сайр дар торикӣ» ва «Бо кафши ман роҳ рав!» - ро гузаронданд. Маълум шуд, ки мардум дар муносибат бо одамони маъюбиятдошта хеле меҳрубону ҳалим ва дилсӯзанд.
Бузургмеҳри БАҲОДУР, «Ҷумҳурият»
Баёни ақида (0) Санаи нашр: 01.07.2021 №: 131 Мутолиа карданд: 655