Тоҷикистон мусобиқаи байналмилалиро мизбонӣ кард

Бахшида ба 30-солагии Истиқ-лолияти давлатӣ дар Маҷмааи варзишии «Қасри теннис ва намудҳои варзиши обӣ»-и шаҳри Душанбе мусобиқаи байналмилалӣ оид ба шиноварӣ бо ширкати варзишгарони кишварҳои Тоҷикистон, Россия ва Ӯзбекистон баргузор шуд.

Варзишгарон дар масофаи 50, 100, 200 ва 400 метр аз рӯи равияҳои тарзи озод, пуштнокӣ, батерфляй, брасс ва эстафета зӯрозмоӣ намуданд.

Пас аз натиҷагирии мусобиқот шиноварони Россия бо 25 медал (13 тилло, 7 нуқра, 5 биринҷӣ) мақоми аввалро касб карданд. Зинаи дуюм бо 25 нишон (9, 11, 5) насиби тими Ӯзбекистон шуд. Тоҷикистон бо 19 медал (1, 5, 13) ҷои сеюмро гирифт. 

 

ЧЕМПИОНАТИ АВРУПО

Кадом тимҳо ба 1/4 - финал баромаданд ва кай бозӣ мекунанд?

Мунтахабҳои Швейтсария, Испания, Белгия, Италия, Чехия, Дания, Украина ва Англия пас аз шикаст додани рақибонашон дар даври 1/8 финал ба марҳилаи 1/4 - ниҳоии Чемпионати Аврупо оид ба футбол роҳ ёфтанд, - хабар медиҳад сомонаи мусобиқот.

Ҳамин тариқ, дар ин давр Швейтсария – Испания, Белгия – Италия (2 июл), Чехия – Дания ва Украина – Англия (3 июл) рақобат мекунанд. 

 

ФУТЗАЛ

Ширкати мунтахаби мо дар "Continental Futsal Championship 2021"

Тими мунтахаби футзали Тоҷикистон зери роҳбарии сармураббии ҷадид – Пайрав Воҳидов дар Мусобиқаи байналмилалии «Continental Futsal Championship 2021» (25 - 30 июл, Бангкок, Тайланд) ширкат меварзад.

Мусобиқот бо иштироки 8 мунтахаб - Тоҷикистон, Тайланд, Литва, Эрон, Ӯзбекистон, Миср, Мозамбия ва Косово мегузарад. 

 

200 000 ДОЛЛАР

барои медали тиллои олимпиада

Тибқи иттилои сомонаи Podrobno.uz, мақомоти Ӯзбекистон андозаи маблағи ҷоизаро барои варзишгароне, ки дар Бозиҳои олимпӣ ва паралимпӣ дар Токио медал ба даст меоранд, тасдиқ кард.

Бар пояи маълумоти манбаъ, варзишгарон барои медали биринҷӣ $ 50 000, нуқра $ 100 000 ва тилло $ 200 000 мегиранд.

Маҳмуд БАҲРОМ, шореҳи варзиш