Дар ҷаласаи Кумитаи тадорукотӣ, ки дар шаҳри Душанбе таҳти раёсати муовини раиси Кумитаи рушди сайёҳии назди Ҳукумати Ҷумҳурии Тоҷикистон Камолиддин Муъминзод бо иштироки намояндагони вазорату идораҳои дахлдори кишвар баргузор гардид, масъалаи омодагиҳо ба вохӯрии роҳбарони мақомоти сайёҳии давлатҳои аъзои Созмони ҳамкории Шанхай баррасӣ шуд.

Камолиддин Муъминзод изҳор дошт, ки бо мақсади дар сатҳи баланд гузарондани вохӯрии мазкур ва форуми сайёҳӣ кумита дар ҳамкорӣ бо вазорату идораҳои марбута нақша - чорабиниҳоро тарҳрезӣ намудааст.

Ин вохӯрӣ 15 - 16 июли соли равон дар шаҳри Душанбе ва дар доираи он баргузории Форуми сайёҳии СҲШ ва Фестивали хӯрокҳои миллии давлатҳои аъзо пешбинӣ шудаанд.

Тавре Кумитаи рушди сайёҳӣ иттилоъ медиҳад,  рӯзи аввал - 15 июл дар Китобхонаи миллии Тоҷикистон вохӯрии мақомоти сайёҳии давлатҳои аъзои СҲШ баргузор мегардад. Нимаи дуюми ҳамин рӯз дар Китобхонаи миллӣ бо иштироки зиёда аз 200 нафар форуми сайёҳӣ ба кори худ оғоз менамояд.

Рӯзи дуюм  - 16 июл дар Боғи  «Ирам» бо иштироки меҳмонон Фестивали хӯрокҳои миллии давлатҳои аъзои СҲШ баргузор мегардад. Ҳамчунин, дар Боғи «Ирам» аз ҷониби Вазорати фарҳанги Ҷумҳурии Тоҷикистон барои иштирокдорони фестивал барномаи фарҳангӣ пешниҳод мешавад. Меҳмонон аз қалъаи Ҳисор низ дидан мекунанд.

 

Ш. ҚУРБОН, «Ҷумҳурият»