Армуғони идонаи Пешвои миллат - китоби «Тоҷикон» - и аллома Бобоҷон Ғафуров дар рӯзи таҷлили  Ваҳдати миллӣ ба дасти сокинони шаҳри Истаравшан низ расид.

Тавре аз маркази матбуоти раиси шаҳри Истаравшан хабар доданд, шоҳасари мазкур аз ҷониби комиссияи босалоҳияти Дастгоҳи иҷроияи Президенти Ҷумҳурии Тоҷикистон қабул ва рақамгузорӣ шуда, ба ҳар хонавода ҳамчун туҳфаи таърихӣ ва рамзию арзишманд тақдим мегардад. Айни замон, тақсимоти китобҳо дар 10 ҷамоати деҳот ва 22 кумитаи маҳаллаи шаҳр муташаккилона ҷараён дорад.

 

Озмуни «Мо бо шумоем!» ғолибони худро ёфт

Озмуни ҷумҳуриявии «Мо бо шумоем!» дар Донишгоҳи миллии Тоҷикистон ҷамъбаст гардид. Барандаи Шоҳҷоизаи озмун, дипломи иштирокчӣ ва  мукофоти махсуси ҶДММ «Сарманзил» - ро  Шукрона Зоҳирова аз ноҳияи Абдураҳмони Ҷомӣ ва Хатича Муслимова аз шаҳри Душанбе сазовор  гардиданд. 

Шоҳҷоиза ва мукофоту дипломро ба ғолиби озмун  ёрдамчии Президенти  Ҷумҳурии Тоҷикистон оид ба маъалаҳои рушди иҷтимоӣ ва робита  бо ҷомеа Эмомалӣ Насриддинзода, муовини якуми раиси Ҳизби Халқии Демократии Тоҷикистон Абдуҷаббор Азизӣ ва директори ҶДММ «Сарманзил» Маҳмудҷон Муродов супурданд.

Ҷойҳои аввалро дар  номинаи «Суханварӣ ва қироати шеър» Меҳрона Маҷидова, дар номинаи «Маҳорати сурудхонӣ» Хушдил Шанбиев ва дар «Навохтани асбобҳои мусиқии муосир ва халқӣ»  - Шерзод Ҳасанов аз ноҳияи Зафаробод сазовор шуданд. 

 

Бузургмеҳри БАҲОДУР, «Ҷумҳурият»