мулоқотҳо
МУЛОҚОТИ ЭМОМАЛӢ РАҲМОН БО СТАНИСЛАВ ЗАС
1 июл дар Қасри миллат Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Дабири кулли Созмони Аҳдномаи амнияти дастҷамъӣ Станислав Засро ба ҳузур пазируфтанд.
Ҳангоми мулоқот самтҳои афзалиятноки раёсати Тоҷикистон дар Созмони Аҳдномаи амнияти дастҷамъӣ дар соли 2021, вазифаҳои имрӯзаи созмон ва баъзе масъалаҳои мубрами рӯзномаи минтақавӣ ва байналмилалӣ баррасӣ гардиданд.
Президенти мамлакат муҳтарам Эмомалӣ Раҳмон зикр намуданд, ки Тоҷикистон тибқи афзалиятҳои дар доираи созмон эълоншуда, вазифаҳои раёсати худро пайваста иҷро менамояд.
Таъкид гардид, ки то имрӯз дар Тоҷикистон ҷаласаҳои кумитаи котибони шӯроҳои амният, шӯроҳои вазирони дифоъ ва вазирони корҳои хориҷӣ баргузор гардид ва корҳои омодагӣ ба баргузории иҷлосияи Шӯрои амнияти дастҷамъии Созмони Аҳдномаи амнияти дастҷамъӣ идома дорад.
Аз фаъолияти котиботи созмон ҷиҳати мусоидат дар омодагӣ ва гузарондани чорабиниҳои бобарор дар Тоҷикистон изҳори қаноат карда шуд.
Ҷонибҳо оид ба вазъи душвори низомиву сиёсӣ дар минтақа табодули андеша намуда, мустаҳкам кардани ҳифзи сарҳади байни Тоҷикистону Афғонистонро зарур шумурданд.
Дар вохӯрӣ, инчунин, дигар масъалаҳои ҷорӣ, аз ҷумла омодагӣ ба баргузории мулоқоти навбатии сарварони давлатҳои аъзои Созмони Аҳдномаи амнияти дастҷамъӣ, ки соли равон дар шаҳри Душанбе баргузор мегардад, баррасӣ шуданд.
Баёни ақида (0) Санаи нашр: 02.07.2021 №: 132 Мутолиа карданд: 4745