Кишоварзони ноҳияи Рашт солҳост, ки дар таъмини амнияти озуқавории мамлакат саҳми назаррас доранд. Зиёд кардани масоҳати кишти картошка ва васеъ намудани майдони боғотро аз ҳисоби заминҳои талу теппа ва бекорхобидаи аз гардиши кишоварзӣ берунмонда дар асоси дастуру ҳидоятҳои Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон сармашқи кори худ қарор дода, дар ин ҷода пайваста фаъолияти пурсамар мебаранд.

Ба гуфтаи масъулон дастгирии соҳаи кишоварзӣ дар меҳвари таваҷҷуҳи роҳбарияти ноҳия қарор дошта, дар доираи нақшаи тадбирҳо ҷиҳати рушди соҳа ба масъалаи обёрии заминҳо таваҷҷуҳи ҳамешагӣ зоҳир мегардад. Маҳз соли сипаришуда ба ин ҳадаф дар мавзеи “Дашти беоб”- и деҳоти Ҳоит 2,5 километр қубур хобонда шуд, ки маблағи корҳои ба анҷомрасида 285 ҳазор сомониро ташкил медиҳад.

Бо дастгирии обистифодабарандагон дар канали “Намуна”-и деҳоти Ҳоит дар масофаи 8 километр, Қарашаҳр 1 ва 2, Ҳисорак 1 ва 2 дар деҳоти Ясман дар масофаи 33 километр ва дар деҳаи Сари Шухони деҳоти Аскалон дар масофаи 7 километр ба маблағи 112800 сомонӣ корҳо ба анҷом расонда шуданд.

Бо ҷалби маблағҳои соҳибкорон ва аҳолӣ дар Ҷамоати деҳоти Қалъаи Сурх марҳилаи якуми сохтмони канали “Мардумӣ” идома дорад, ки бо ба истифода додани он зиёда аз 100 гектар заминҳо обёрӣ мешавад.   Ҳамчунин, бо ҷалби маблағҳои шарикони рушд дар деҳоти Қалъаи Сурх канали Камчароғ, ки солиёни зиёд аз истифода берун монда буд, ба маблағи 228 ҳазор сомонӣ аз таъмири асосӣ бароварда шуд, ки дар натиҷа 150 гектар замин ба гардиши кишоварзӣ баргардонда мешаванд.

Бо вуҷуди чунин дастгириҳо ҳанӯз ҳам дар ин самт мушкилоти зиёд вуҷуд дорад. Масалан, дар ноҳия 9 пойгоҳи обкашӣ ва чоҳҳои амудӣ мавҷуд буда, 17 агрегату насосҳои обкашонӣ фаъолияти онҳоро ба низом медарорад. Ҳоло 3 адади он эҳтиёҷ ба таъмиру барқарорсозӣ дошта, дар сурати мувофиқи матлаб барқарор гардиданашон 313 гектар замин бо оби полизӣ таъмин мегардад.

Пойгоҳҳои обкашии “50-солагии Тоҷикистон”- и Ҷамоати деҳоти Навдӣ, “Гамбариён”- и Ҷамоати деҳоти Қалъаи Сурх ва “Фурудгоҳ”- и Ҷамоати деҳоти Нусратулло Махсум дар соҳили дарёи Сурхоб ҷойгир буда, ҳамасола бо каму беш шудани маҷрои дарё зарурати насби заминҳои иловагӣ пеш меояд, то фаъолияти бонизоми иншооти обрасонӣ пурра таъмин шавад. Илова ба ин, бар асари корхурдашавии таҷҳизотҳо пойгоҳҳои обкашии мазкур аз кор баромада, зарурати барқарор кардани онҳо пеш омадааст. 

Ёдовар мешавем, ки пойгоҳи обкашии “50-солагии Тоҷикистон” соли 1985 бунёд шуда, аз 6 агрегат иборат мебошад ва солҳои қаблӣ 309 гектар майдони боғу кишти зироатҳои ҳудуди Ҷамоати деҳоти Навдиро бо об таъмин менамуд. 

Пойгоҳи обкашии “40-солагии Тоҷикистон” барои таъмини 60 гектар заминҳои ҳудуди Ҷамоати деҳоти Боқӣ Раҳимзода пешбинӣ шуда, то ҳамин давра коргарон корҳои таъмиру барқарорсозиро анҷом дода, 37 хоҷагии деҳқониро бо оби полизӣ таъмин намуданд.

Ба воситаи 9 пойгоҳу 14 канали худмавҷуд дар ҳудуди ноҳия 3339 гектар замин обёрӣ мешавад, аммо имрӯз бар асари як қатор мушкилоти мавҷуда 1123 гектари он бо об таъмин нест. 

Мақомоти иҷроияи маҳаллии ҳокимияти давлатии ноҳия дар доираи имконоти мавҷуда бо ҷалби соҳибкорону роҳбарони хоҷагиҳои деҳқонӣ пайваста талош дорад ва дар ин самт корҳои назаррас ба анҷом расондааст. Аммо ин вазъият аз Агентии беҳдошти замин ва обёрӣ зерсохтори он дар ноҳия тақозо мекунад, ки бо мақсади иҷрои дастуру супоришҳои Пешвои миллат ва рушди соҳаи кишоварзӣ ҷиҳати бартараф кардани мушкилоти обёрии заминҳо тадбирҳои саривақтӣ андешанд.

 

Худодод ЗАЙНИДДИН, 

“Ҷумҳурият”