Дар ҳар як шаҳру ноҳия иншоот, мавзеъ ва ё бинои маъмурие мавҷуд аст, ки дар ҳаёти сокинони он нақши муҳим дорад ва бо гузашти солҳо ҳам мардум аз он ба некӣ ва ифтихор ёдовар мешаванд. Маҷмааи варзиши шаҳри Истиқлол аз ҷумлаи ҳамин гуна иншоот буда, миёни мардум чун “мактаби чемпионҳо” маҳбубият дорад.  

Бунёди ин маҷмааи варзиш ба гуфтаи Исҳоқҷон Зокиров, сокини шаҳр, сармуҳаррири нашрияи вилоятии «Согдийская Правда», ба се марҳила рост меояд. Давраи аввал солҳои 1948 - 1949, ки шаҳрак дар тавозуни корхонаи азими кӯҳӣ - кимиёии Ленинобод (ҳоло комбинати металлҳои нодири шаҳри Бӯстон) буд. Марҳилаи дуюми рушди маҷмаа ба корхонаи машҳури «Заря Востока» - и шаҳри Истиқлол  алоқаи зич дорад, хосатан ба давраи роҳбарии директори генералии корхона шодравон Иван Средний, ки дар маҷмаа бозсозиҳои ҷиддӣ ба вуқӯъ пайваст: майдонҳои гӯштигирӣ, теннис, ҳавзи шиноварӣ ва ба шарафи чемпиони ҷаҳон шудани Зебунисо Рустамова майдони камонварӣ ин ҷо илова шуданд. Давраи ниҳоӣ бошад, ба замони соҳибистиқлолӣ рост меояд. 

Ба гуфтаи Бахтиёр Абдуаҳадов, директори Муасиссаи давлатии «Мактаби варзишӣ» - и шаҳр, сафи нафароне, ки ба варзиш машғул мешаванд сол ба сол меафзояд. Қариб ҳар рӯз бо ширкати варзишгарони шаҳр ва меҳмонон чорабинии варзиш баргузор мегардад. Замони Иттиҳоди Шӯравӣ тарбиятгирандагони ин мактаб аз худ номи ҷовидонӣ гузоштанд. Масалан, Валерий Кравченко дар ҳайати мунтахаби волейболи Иттиҳоди Шӯравӣ дар Бозиҳои олимпии Мехико – 1968, Ҷоми ҷаҳон (Полша, 1965), чемпионатҳои Аврупо (1967, 1971) унвони қаҳрамониро ба даст овардааст. 

- Чун сухан аз бозии футбол равад ҳатман мардуми шаҳр аз бозигари соҳибном Эдгар Гэсс бо ифтихор ёд мекунанд. Ӯ дар ҳамин ҷо таваллуд шудаву ба воя расидааст. Дар дастаи «Қурама» (Табошар), «Помир» (Душанбе) ва «Спартак» (Москва) ҳунарнамоӣ карда, бо тими «Спартак» чемпиони Иттиҳоди Шӯравӣ (1979) гардидааст, - гуфт Б. Абдуаҳадов. 

Маълумот ва аксҳои ин варзишгарони машҳур дар осорхонаи маҷмаа қарор дошта, насли наврасро дар рӯҳияи тарзи ҳаёти солим ва талош баҳри расидан ба ҳадафҳои олӣ тарбия мекунад. Дар маҷмаа барои тамрин дар ҳама риштаи варзиш шароити муносиб муҳайёст.

Даврон Зоҳидзода, раиси шаҳри Истиқлол, иброз дошт, ки мақомоти иҷроияи ҳокимияти давлатии шаҳр ҷиҳати оммавияти варзиш миёни аҳолӣ, хосатан насли наврасу ҷавон чораҳои зарурӣ андешида истодааст. Варзишгарони шаҳр замоне дар ҷаҳон машҳур буданд. Аз ин рӯ, мо кӯшиш менамоем, ки варзишгарони сатҳи минтақавию ҷаҳонӣ ба камол расонем, то номбардори Тоҷикистон бошанд. 

 

Ҷовиди АШТӢ, «Ҷумҳурият»