Абдумалик Ибодов, сокини ҷамоат, зимни суҳбат ба хабарнигори «Ҷумҳурият» гуфт, ки роҳ солҳо хароб буд ва мардум дар ин ҷо бо мушкилӣ равуо мекарданд. Он аз ҳисоби соҳибкорону шахсони саховатпешаи маҳаллӣ дар муддати кӯтоҳ асфалтпӯш гардида, барои сокинони деҳаҳои ҷамоат шароити арзандаи рафтуомад фароҳам омад. Дар ин амали нек соҳибкори маҳаллӣ Қиёмиддин Чориқулов нақши арзанда гузошт. Номбурда чунин бунёдкориҳоро дар дигар гӯшаи диёр низ анҷом додааст. 

- Пештар бо сабаби вайрон будани роҳ қисмҳои эҳтиётии воситаҳои нақлиёт зуд корношоям шуда, барои таъмир маблағи зиёд сарф мекардем. Ҳоло мушкилӣ аз байн бардошта шуда, роҳи 40 дақиқаро ба роҳат дар 15 дақиқа тай мекунем, - гуфт ронанда Зиёратшоҳ Ҷойлобов. 

Баробари бунёди роҳ, инчунин, дар деҳаи Навободи ҷамоат хати оби нӯшоӣ барои чорво ва сокинон, ки бо дастгирии Ҳукумати  Ҷумҳурии Тоҷикистон ва муассисаи давлатии маркази идораи лоиҳаи «Рушди чорводорӣ ва чарогоҳҳо» кашида шудааст, мавриди истифода қарор дода шуд. 

Сокинон аз норасоии оби нӯшоӣ танқисӣ мекашиданд. Акнун мушкилии онҳо роҳи ҳал пайдо кард. Оби нӯшоӣ аз 3200 метр тавассути қубури пластикӣ аввал ба ду ҳавз, ғунҷоиши ҳар кадом 100 метри мукааб ворид гардида, пас аз безараргардонӣ тақсим мешавад. Оби нӯшоӣ барои 377 оила пешбинӣ шуда, дар назар аст, ки деҳаҳои атроф низ бо об таъмин карда шаванд. 

Сипас, гурӯҳи корӣ дар муассисаи таҳсилоти миёнаи умумии № 29 бо сокинони деҳа мулоқот анҷом дод. Қурбон Ҳакимзода бо миннатдорӣ аз соҳибкорон гуфт: "Иншооти ҷашнии бунёдшуда  солҳо ба сокинон хидмат хоҳад кард. Инфрасохтори деҳот рушд карда, симои шаҳраку деҳот дигар мегардад ва ҷойҳои нави кор низ пайдо мешаванд".

Ба шарофати дастгириҳои Ҳукумати ҷумҳурӣ бунёду азнавсозии роҳу пул, иншооти маъмурии ҷамъиятӣ дар ноҳия вусъат мегирад. Ин тадбирҳо ба хотири сазовор ва бо дастовардҳои арзанда истиқбол гирифтани Ҷашни 30 – солагии Истиқлолияти давлатӣ амалӣ мегарданд, - гуфт Асадулло Раҳмон.

Дар анҷоми чорабинӣ ба соҳибкор Қиёмиддин Чориқулов ҷоизаи «Ободгари Ватан», ба соҳибкорону сохтмончиён ва механизатороне, ки дар асфалтпӯш кардани роҳ саҳм гузоштанд, сипосномаю туҳфаҳо тақдим шуд.

Чунончи иттилоъ доданд, ба ифтихори ҷашни миллӣ дар деҳаҳои ҷамоат бунёду навсозии 27 иншооти таъйиноти гуногун ба нақша гирифта шудааст.