ИХТИРОИ ҶОЛИБИ ОЛИМИ ҶАВОНИ ТОҶИК

Шаҳрванди Тоҷикистон Ҷасур Ҳасанов, ки аспиранти Донишгоҳи давлатии Урали Ҷанубии Россия мебошад, дар доираи кори илмиаш “Мудирияти муассири осиёби истеҳсоли семент дар шароити зиддунақиз”  бо ёрии зеҳни сунъӣ барномаи махсусе коркард ва ба Корхонаи сементи шаҳри Коркинои вилояти Челябинск пешниҳод намуд. Дар ин бора SPUTNIK иттилоъ додааст.

- Бино ба санаде, ки корхона ироа намудааст, баъди роҳандозии бозёфти олими ҷавон харҷи барқ аз 38 - 43 ба 36, 5 - 41,5 киловат- соат, маҳсулоти баргашта (крупка) аз 37 - 98 ба 40 - 65 тонна зиёд гашта, суръати осиёб аз 74 - 82 ба 75 - 80 дарсад афзудааст, - омадааст дар сомона.

Зимнан, Ҷасур Ҳасанов соли 2010 Донишгоҳи техникии Тоҷикистон ба номи академик Муҳаммад Осимиро бо ихтисоси муҳандиси барномасоз хатм намуда, соли 2016 донишгоҳ ӯро барои идомаи таҳсил ба аспирантураи  Донишгоҳи давлатии Урали Ҷанубӣ фиристод. 

 

БОЗЁФТИ НАВ ДАР ШАҲРАКИ ҚАДИМАИ САЙЁД

Кормандони Осорхонаи миллии Тоҷикистон зимни корҳои бостоншиносӣ дар шаҳраки қадимаи Сайёди ноҳия Абдураҳмони Ҷомӣ анбор ва ошхонаи ёдгориро кашф намуданд.

Дар ҳудуди ошхона оташдонҳо, ки барои омода намудани хӯрок истифода мешуд, ёфт гардид. Аз ин макон, ҳамчунин, сиккаҳои мисин пайдо шуд, ки рӯи он шоҳи Кӯшонӣ тасвир шудааст. Бозёфти ороишии аз гулмоҳии баҳрӣ омодагардида, аз ҳамкорӣ  ва тиҷорати мардуми маҳал бо мардумони дигар минтақаҳо гувоҳӣ медиҳад. Бостоншиносон дар яке аз биноҳои ин ёдгорӣ қубури сафолин пайдо намуданд. Бозёфт шаҳодат аз он аст, ки мавзеи таърихӣ аз низоми обтақсимкунӣ бархӯрдор буд. Ангуштарин, сӯзан, пайкон, сарнайзаҳои биринҷӣ ва ашёи ороиши занон аз ҷумлаи бозёфтҳои дигаре мебошанд, ки зимни корҳои ҳафриётӣ аз ин мавзеъ пайдо шудаанд.

 

НАХУСТПАРВОЗИ МУВАФФАҚОНАИ “AIRCAR”

Мошини  паррони кашфнамудаи муҳандиси словакӣ - “Aircar” нахустин парвозашро муваффақона анҷом дод. Дар ин бора сомонаи РИА Новости иттилоъ додааст.

Бино ба маълумоти сомона, худрав аз фурудгоҳи шаҳри Нитра то фурудгоҳи Братиславаи Словакия (80 километр) парвоз кард. Онро худи муҳандис Стефан Клейн идора намуд. Стефан иттилоъ додааст, ки худрави паррон ин масофаро давоми 25 дақиқа тай намудааст. Ин дар ҳолест, ки тавассути мошини муқаррарӣ тай намудани ин масофа вақти бештарро талаб менамояд.  

Зимнан, мошини паррон дар баландии  то 2500 метр тақрибан бо суръати 170 киллометр/соат ҳаракат менамояд.

 

Фарзона ФАЙЗАЛӢ, “Ҷумҳурият”