ТАСС. Президенти Россия Владимир Путин имрӯз бо иҷрокунандаи вазифаи Сарвазири Арманистон Никол Пашинян вомехӯранд, - хабар додааст хадамоти матбуоти Кремл.

«Зимни вохӯрӣ муҳокимаи рафти амалишавии изҳороти сарварони Россия, Арманистон ва Озарбойҷон оид ба Қариябоғи Кӯҳӣ аз 9 ноябри соли 2020 то 11 январи соли 2021 ба нақша гирифта шудааст. Инчунин, ба масъалаҳои ёрӣ расондан ба аҳолии ноҳияҳои аз амалиёти ҳарбӣ зарардида, барқарор кардани робитаҳои иқтисодӣ ва нақлиётӣ дар минтақа таваҷҷуҳи махсус дода мешавад», - гуфта мешавад дар хабар.

 

 

Изҳороти Департаменти давлатӣ 

ТАСС. Намояндаи махсуси ИМА оид ба Афғонистон Залмай Халилзод дар ҳолати зарурӣ омодааст ҷиҳати муҳокимаи мавзӯи банизомдарории Афғонистон ба Доха сафар намояд. Дар ин бора сарвари хадамоти матбуоти Департаменти давлатӣ Нед Прайс иттилоъ додааст.

«Аъзои дастаи мо дар маҳалҳои гуфтушуниди Доха фаъолият карданд. Тавре ман медонам, намояндаи махсус Залмай Халилзод алҳол дар Вашингтон қарор дорад, вале дар сурати пайдо шудани зарурати баргаштан ба Доха, ӯ  омодааст, ки ин корро анҷом диҳад», - гуфт корманди идораи сиёсати хориҷии Амрико.

Ӯ, инчунин, зикр кард, ки маъмурияти ИМА гуфтушунидҳои байниафғониро дастгирӣ менамояд ва бо роҳи сиёсӣ банизомдарории Афғонистонро ягона омили бадастории натиҷаҳои одилона ва устувор медонад. 

 

 

Иттиҳоди Аврупо бояд ба мавҷи чоруми пандемия омода бошад 

Лента. ру. Сарвазири Словения Янез Янша аз сарварони Иттиҳоди Аврупо даъват кард, ки ба мавҷи чоруми пандемияи коронавирус омодагӣ бинанд.

«Мо барқароршавии ботадриҷи ҳаёти ҷамъиятиро мебинем, вале  диққатамонро ба омодагӣ ба мавҷи чоруми эҳтимолии коронавирус равона месозем», - зикр кард сиёсатмадор. Ӯ қайд намуд: «Иттиҳоди Аврупо намехоҳад, ки афзоиши нави беморӣ он мушкилотеро биорад, ки соли гузашта дар минтақа мушоҳида мекардем. Ба гуфтаи Янез Янша пешгирии мавҷи чоруми COVID-19  барои сарварони аврупоӣ бартарии аввалин мебошад. «Мо бояд кӯшиш намоем, ки дар нимсолаи наздик тадриҷан ба ҳолати зиндагии муқаррарии пеш аз пандемия доштаамон баргардем, ҳарчанд баъзе чораҳо бояд ба муҳлати дурудароз боқӣ монанд», - гуфт сарвазир. 

 

 

Россия ҷаласаи Ассамблеяи парлумони САҲА – ро тарк кард

Газета. ру. Ҳайати Россия дар Ассамблеяи парлумони Созмони амният ва ҳамкорӣ дар Аврупо бо нишони эътироз бар зидди вайрон кардани  низомнома ҷаласаро тарк намуд, - хабар медиҳад «Интерфакс».

«Агар шумо мувофиқи  низомнома кор кардан хоҳед, зарур аст, ки онро  риоя кунед. Агар хоҳед, ки аз рӯи манфиатҳои сиёсии худ қарор қабул намоед, пас мо дар он иштирок нахоҳем кард», - гуфт зимни ҷаласа раиси ҳайати Россия дар Ассамблеяи парлумони САҲА Пётр Толстой.

Ӯ, инчунин, шарҳ дод, ки ассамблея қоидаи дар низомнома навиштаро оид ба он ки қарорҳо бо раъйи аз се ду ҳиссаи аъзои ассамблея қабул мешаванд на бо раъйи аз се ду ҳиссаи вакилоне, ки мустақиман ё рӯ ба рӯ дар ҷаласа иштирок мекунанд, риоя накард.