Маркази матбуоти Қӯшунҳои сарҳадии Кумитаи давлатии амнияти миллии Ҷумҳурии Тоҷикистон хабар дод, ки шаби 4 ба 5 июли соли 2021 қувваҳои ҳаракати «Толибон» вулусволиҳои Хоҳон, Шикай, Нусай, Моҳимай, Шуғнон ва Султон-Ишкошими вилояти Бадахшони Ҷумҳурии Исломии Афғонистонро, ки бо Ҷумҳурии Тоҷикистон дар минтақаи мазкур 910 километр сарҳади умумӣ доранд, пурра таҳти назорати худ қарор доданд.

Дар муқовиматҳои мусаллаҳона бо «Толибон», 1037 низомии Қувваҳои Мусаллаҳи Афғонистон ақибнишинӣ карда, бо мақсади наҷоти ҷони худ, тавассути минтақаҳои сарҳадии ноҳияҳои Шамсиддин Шоҳин, Дарвоз, Ванҷ ва Ишкошим вориди хоки Ҷумҳурии Тоҷикистон гаштанд.

Бо назардошти муносибатҳои неки ҳамсоядорӣ  ва дахолат накардан ба умури дохилии Ҷумҳурии Исломии Афғонистон, ба  низомиёни  ин кишвар  иҷозати воридшавӣ ба ҳудуди Тоҷикистон дода шуд.

Айни ҳол вазъият дар марзи давлатии Тоҷикистону Афғонистон таҳти назорати сарҳадбонони тоҷик қарор дорад.

 

 

Мулоқоти вазири корҳои хориҷӣ  бо муовини Дабири кулли СММ

Дар мулоқоти вазири корҳои хориҷии Ҷумҳурии Тоҷикистон Сироҷиддин Муҳриддин бо муовини Дабири кулли СММ оид ба масъалаҳои иқтисодӣ ва иҷтимоӣ (UN DESA) Лю Женмин Ню-Йорк масъалаҳои иқтисодӣ ва иҷтимоӣ, аз ҷумла обу иқлим, татбиқи қатъномаи «Конфронси СММ оид ба арзёбии раванди татбиқи ҳадафҳои Даҳсолаи байналмилалии амал «Об барои рушди устувор, 2018 - 2028» (Ню-Йорк, 2023), иштироки фаъоли Тоҷикистон дар чорабинии муҳими дарпешистода - Муколамаи сатҳи баланд оид ба энергетика (High level diаlogue on Energy) ва таъсири ҳамагирии СOVID - 19 ба раванди татбиқи Ҳадафҳои рушди устувор баррасӣ шуданд.

Ҷонибҳо аз иқдоми навбатии Президенти Ҷумҳурии Тоҷикистон муҳтарам Эмомалӣ Раҳмон дар бораи эълон намудани соли 2025 ҳамчун Соли байналмилалии ҳифзи пиряхҳо ёдовар шуда, аҳамият ва саривақтӣ будани онро дар шароити имрӯзаи ҷаҳонӣ таъкид карданд.

 

 

Қаноатмандӣ аз ҳамкории БМТ  бо Дафтари SECO дар Тоҷикистон

Муовини якуми раиси Бонки миллии Тоҷикистон Ҷамолиддин Нуралиев дар мулоқот бо директори Дафтари Швейтсария оид ба ҳамкорӣ (SECO) дар Ҷумҳурии Тоҷикистон хонум Саломе Штайб аз дастгириҳои пайваста оид ба ҳамкорӣ дар бахши иқтисодиёт, бахусус низоми бонкӣ бо роҳандозии як  зумра  кумакҳои техникӣ изҳори қаноатмандӣ намуд. 

Инчунин, Ҷамолиддин Нуралиев оид ба татбиқи лоиҳаи «Тоҷикистон: барномаи устуворнамоии бахши молиявӣ» дар алоҳидагӣ, аз ҷумла устуворнамоии бахши молиявӣ, механизми танзими бонкӣ, фишангҳои идоракунии қарзҳои ғайрифаъол, назорати низоми пардохт, принсипҳои назоратии ҳимояи ҳуқуқи истеъмолкунандагон ва идоракунии корпоративии низоми бонкӣ таҳлилу натиҷагирии мушаххасро манзури ҳозирин кард.

Хонум Саломе Штайб ба сатҳу сифати ҳамкории тарафайн баҳои баланд дода, омодагии хешро барои муносибатҳои судманд баҳри рушди низоми бонкии Ҷумҳурии Тоҷикистон яке аз самтҳои афзалиятнок иброз дошт.

 

 

Бастаи навбатии ваксинаи «AstraZeneca»  ба Тоҷикистон ворид мешавад

Нимаи дуюми моҳи августи соли равон бастаи навбатии ваксинаи «AstraZeneca» ба ҷумҳурӣ ворид карда мешавад. Иқдоми мазкур бо шарикон оид ба рушд, хусусан бо  Созмони  ҷаҳонии тандурустӣ, Хазинаи кӯдакони СММ ва Алянси глобалии ваксина ва иммунизатсия рӯи даст гирифта шудааст. 

Ба иттилои сардори раёсати амнияти санитарию эпидемиологӣ, ҳолатҳои фавқулода ва кумаки фаврии тиббии Вазорати тандурустӣ ва ҳифзи иҷтимоии аҳолӣ Наврӯз Ҷаъфаров, Ҳукумати Ҷумҳурии Тоҷикистон кӯшиш дорад, ки бо истифода аз дигар манбаъҳо воридоти ваксинаҳоро зиёдтар кунад. Ҳоло бо Бонки ҷаҳонӣ оид ба маблағҳои грантӣ ба маблағи зиёда аз 8 миллион доллар шартнома баста шудааст. Инчунин, бо Бонки осиёгии рушд низ шартнома ба маблағи 25 миллион доллар ба имзо расидааст.