Ҳокимшоҳ Идиев миёни иқтисодчиёну саноатчиён бо дастовардҳои назарраси истеҳсолӣ машҳур аст. Умре  дар соҳаҳои гуногуни иқтисоди миллӣ фаъолияти самарабахш намуда,  ҳамчун соҳибкори ватандӯсту навовар  ном  баровардааст. Аз ҷумла, дар татбиқи яке аз ҳадафҳои муҳиму ояндасози Ҳукумати кишвар – саноатикунонии босуръат нақши шоён дорад.  ҶДММ «Сифат саноат», ки роҳбариашро ба уҳда дорад, яке аз корхонаҳои муваффақи саноатии кишвар ба ҳисоб меравад.

 

Тавре зикр шуд, номбурда имрӯзҳо  дар ҷодаи саноати сабук ба кори истеҳсолӣ машғул аст. Корхонааш барои дӯхти либоси кормандони соҳаи тиб, хоҷагидорону муҳофизон ва роҳрӯбон махсус гардонда шуда, бо вусъати домони истеҳсолот муассисаҳои тиббии кишвар, бахусус шаҳри Душанберо, бо либос таъмин намуда истодааст. Маҳсулоташ ҷавобгӯи талаботи байналмилалӣ буда, дар намоишгоҳҳои сатҳи ҷаҳонӣ муаррифкунандаи Тоҷикистонанд. 

Ӯ соли 2017 бо чанд нафар бонуи соҳибҳунар  коргоҳи хурде  боз намуд ва  дар муддати кӯтоҳ онро ба корхонаи бузурге табдил дод. Пайваста тарҷибаи кишварҳои хориҷиро меомӯзаду навовариҳоро дар амал татбиқ менамояд: таҷҳизоти нав ворид сохта, технологияи муосири дӯзандагиро роҳандозӣ намуд. Тадриҷан сафи кормандони ин корхона  меафзояду  шароити корӣ низ беҳтар мешавад. Беш аз 70 бонуи хонашин аз оилаҳои камбизоат ва эҳтиёҷманд бо ҷои кор ва маоши хуб таъмин аст.  

Мо – саноатчиён бояд дар бартараф сохтани мушкилоти кадрии соҳа бетараф набошем. Малакаю  таҷрибаи худро ба насли ҷавон омӯзонем, то онҳо рушди соҳаро таъмин намоянд. Тоҷикистон барои рушди саноати сабук заминаи устувор дорад: пахта дорем, корхонаҳои калони дӯзандагӣ низ. Танҳо бояд бо истифода аз таҷрибаҳои пешқадам ин имкониятҳоро самаранок истифода барем. Барои амалӣ намудани чунин ҳадафҳо  омода кардани мутахассис лозим меояд, зеро корро шахси кордон пеш мебарад», - ибрози андеша мекунад сарвари корхона. 

Кӯшишҳои Ҳокимшоҳ Идиев дар роҳи рушди саноат аз назарҳо дур намемонанд. Чанде пеш дар озмуне, ки Иттифоқи рушди бахши хусусии Тоҷикистон ба муносибати иди касбии кормандони соҳаи саноати сабук эълон намуд,  номбурда сазовори ҷои аввал ва «Соҳибкори беҳтарини соҳа – 2021» эътироф гашт. 

Маҳсулоти «Сифат саноат»-ро иштирокчиёни намоишгоҳҳои зиёди  дохиливу хориҷӣ хуш мепазиранд. Дар Форуми III нассоҷӣ ва дӯзандагии корхонаҳои аъзои Иттифоқи рушди бахши хусусии Тоҷикистон, ки дар меҳмонхонаи «Ҳаят Реҷенси» гузашт, маҳсулоти корхона баҳои баланд гирифт. 

Баробари ҳамаи ин муваффақияту комёбиҳо,  Ҳокимшоҳ Идиев шахси некманиш аст. Дар пайравӣ аз Пешвои миллат муҳтарам Эмомалӣ Раҳмон ташаббусҳои созандаю хайрхоҳонаро пеш мегирад. Ин амалҳои ҷавонмардонаи Ҳокимшоҳ Идиев соли гузашта дар айёми авҷи бемории ҳамагири коронавирус бештар ба назар расиданд. Дар давраҳои мушкил то ҳадди тавон муассисаҳои тиббии пойтахтро бо рахти хоб ва либоси муҳофизативу ниқоб таъмин кардаву мекунад ва инро қарзи шаҳрвандии хеш меҳисобад. Он чи зикраш рафт танҳо чанд нукта аз фаъолияти пурсамари соҳибкори кордон аст, ки  чун муште аз хирвор овардем. 

 

Меҳрангез ҚОДИРОВА, 

“Ҷумҳурият”