иҷтимоиёт
НОҲИЯИ ВОСЕЪ. АВЛАВИЯТ БА ҲИФЗИ ИҶТИМОӢ
Фаъолияти Муассисаи давлатии «Хона - интернати беморони рӯҳии ноҳияи Восеъ» бобати дар сатҳи зарурӣ расондани хизматҳои иҷтимоию тиббӣ таҳти назорати доимии кормандони Агентии давлатии ҳифзи иҷтимоии аҳолӣ қарор дорад.
Роҳбарияти агентӣ фаъолияти кории муассисаро мавриди муҳокима қарор дода, риояи меъёри хӯрок, техникаи бехатарӣ, таъминоти сарулибос, одоби муошират, вазъи таъминот бо доруворӣ, нигоҳдорӣ ва назорати муҳлати истифодабарии онҳо, истифодаи оқилонаи заминҳои хоҷагии ёрирасон, ҷамъоварӣ, захира ва истифодаи гиёҳҳои шифобахш, фаъолияти мунтазами кори «Фито - бар», вазъи риояи меъёрҳои санитарию эпидемиологӣ, омодагӣ ба мавсими тирамоҳу зимистонро таҳти назоратӣ доимӣ қарор додааст.
Бино ба гуфтаи директори муассиса Баҳриддин Шерматов, дар доираи чорабиниҳо бахшида ба Солҳои рушди деҳот, сайёҳӣ ва ҳунарҳои мардумӣ ва ба ифтихори сазовор пешвоз гирифтани Ҷашни 30 - солагии Истиқлолияти давлатии Ҷумҳурии Тоҷикистон дар муассиса корҳои ободонию бунёдкорӣ, таъмири роҳҳои дохилии муассиса ва гулкорию кабудизоркунӣ босуръат идома дорад. Дар ин кор тоҷирону соҳибкорони маҳаллӣ, фаъолону аҳли зиёи ноҳия ва ходимони дин фаъолона ширкат варзида истодаанд.
Бо сабаби корношоям ва фарсуда гардидани қисме аз биноҳои шуъбаю анборҳо дару тирезаҳо рангубор гардида, аз таъмири асосӣ бароварда шуданд. Тамоми ҳуҷраҳо таъмир ва эҳтиёҷмандон бо воситаҳои техникӣ (аробаи маъюбӣ, асобағал, асоча, айнак) таъмин гардиданд.
Муассиса ҷиҳати пешгирии бемории коронавирус чораҳои зарурӣ андешида истодааст. Аз рӯзи аввали пандемия даромадани шахсони бегона ба муассиса қатъиян манъ шудааст.
Мавриди зикр аст, ки Хона - интернати беморони рӯҳии ноҳияи Восеъ соли 1956 мавриди амал қарор гирифта, барои 180 нафар пешбинӣ шудааст. Тибқи Қарори Ҳукумати Ҷумҳурии Тоҷикистон аз 29 ноябри соли 2017 муассиса ба номгӯи муассисаҳои ҳифзи иҷтимоии Агентии давлатии ҳифзи иҷтимоии аҳолӣ дохил гардид. Айни замон дар муассиса 220 нафар будубош дорад.
Аз аввали сол бо роҳхати Агентии ҳифзи иҷтимоии аҳолӣ ба муассиса 6 нафар барои будубоши доимӣ қабул шуд. Дар ҳамин давра 7 бошанда бо дархости волидонашон барои нигоҳубин дар хона ҷавоб шуд.
Дар «Фито-Бар»-и муассиса 23 намуд гиёҳи шифобахши ватанӣ, ба монанди махмалак, тахач, барги лаблабу, садбарги сафед, садбарги сурх, шулха, пудина, барги зуф, арпомодиён, укроп, хуч, қоқу ва ғайраҳо ҷамъ оварда шудааст. Захираи гиёҳҳои шифобахш айни ҳол 256 килограммро ташкил медиҳад.
Кумаки шахсони саховатпеша низ ба назар мерасад. Давоми ним соли ҷорӣ ба муассиса ба маблағи беш аз 250 ҳазор сомонӣ кумак расидааст. Ҳамаи кумакҳо миёни бошандагон тақсим гардиданд.
Заминҳои хоҷагии ёрирасони муассиса, ки 16,7 гектарро ташкил медиҳад (2,7 гектар боғ ва 14 гектар замини корам) самаранок истифода мешаванд. Хоҷагии ёрирасони муассиса фермаи молпарварӣ низ дорад.
Ба хизматрасонии бошандагон 123 корманд машғул аст. Ба баланд бардоштани дараҷаи тахассусии кормандон аҳамияти ҷиддӣ дода шуда, ҷиҳати бозомӯзии онҳо дар курсҳои такмили ихтисос чораҳо андешида мешаванд.
Шаҳбоз АБРОР, «Ҷумҳурият»
Баёни ақида (0) Санаи нашр: 08.07.2021 №: 136 Мутолиа карданд: 754