Бо ибтикори Кумитаи кор бо занон ва оила дар Академияи идоракунии давлатии назди Президенти Ҷумҳурии Тоҷикистон бахшида ба 30-солагии Истиқлолияти давлатӣ ҳамоиши занону духтарон таҳти унвони «Нақши ҷавонон дар 30 соли соҳибистиқлолӣ: дастовард ва дурнамо» баргузор гардид. Дар он занону духтарони фаъол бо намояндагӣ аз вазорату идораҳо ва қишрҳои дигари ҷомеа ширкат варзиданд.

 

Таъкид гашт, ки тӯли солҳои соҳибистиқлолӣ аз ҷониби Пешвои миллат муҳтарам Эмомалӣ Раҳмон баҳри баланд бардоштани мақому манзалати занону духтарон дар ҷомеа тадбирҳои мушаххас рӯи кор омаданд. Ба ин васила нақши бонувон дар таҳкими иқтисоди миллӣ устувор гардид.  

«Президенти мамлакат ба ҷавонон таваҷҷуҳи хос дошта, ташаббусу иқдомоти онҳоро пайваста дастгирӣ менамоянд ва ҷавононро неруи пешбарандаи ҷомеаву ояндаи миллат мехонанд. Дар зарфи 30 сол бо мақсади таъмини иштироки васеи занон дар ҳаёти ҷамъиятиву сиёсӣ, иҷтимоию фарҳангӣ ва идоракунии давлатӣ зиёда аз 40 санади меъёрӣ - ҳуқуқӣ ба имзо расидааст. Аз ҷумла, Фармони Президенти Ҷумҳурии Тоҷикистон «Дар бораи тадбирҳои баланд бардоштани мақоми зан дар ҷомеа» ҳанӯз соли 1999 ба тасвиб расида буд, яке аз санадҳои муҳими таърихӣ ба ҳисоб меравад. Таъсиси квотаҳои президентӣ низ яке аз иқдомоти шоистаи ин давра аст, ки барои таҳсили ҷавондухтарони кӯҳистон роҳ кушод. Ҳоло зиёда аз 13 ҳазор ҷавон тариқи квота ба таҳсил фаро гирифта шудааст», - гуфт раиси Кумитаи кор бо занон ва оила Ҳилолбӣ Қурбонзода. 

Зикр шуд, ки айни замон фаъолияти занон дар хизмати давлатӣ беш аз 24 дарсадро ташкил медиҳад. 73 дарсади кормандони соҳаи маориф ва 68 дарсади соҳаи тандурустӣ ва ҳифзи иҷтимоии аҳолӣ бонувон мебошанд. Наздики 35 ҳазор бону роҳбарии хоҷагиҳои деҳқониро ба уҳда дошта, дар бахши соҳибкорӣ беш аз 77 ҳазор фаъолият мебаранд.

 

Меҳрангез ҚОДИРОВА, «Ҷумҳурият»