Бо супориши Президенти мамлакат муҳтарам Эмомалӣ Раҳмон ҳамаи манзили сокинони деҳаҳои Хоҷаи Аъло ва Сомониёни Ҷамоати деҳоти Чоркӯҳ, ки бар асари низои марзӣ хароб шуда буданд, дар муҳлати муайяншуда барқарор ва бошандагон ба зиндагии маъмулӣ баргаштанд. Раиси вилояти Суғд Раҷаббой Аҳмадзода зимни ба истифода додани манзилҳои барқароршуда ба сокинон аз номи Пешвои миллат муҳтарам Эмомалӣ Раҳмон хонаободию осудагии рӯзгор таманно дошта, барояшон асбобу анҷоми рӯзгор тақдим кард. 

 

Тибқи иттилои раиси ситоди вилоятии барқарорсозии оқибатҳои зарари низои марзӣ Маъруф Муҳаммадзода, дар маҷмӯъ, 29 оила зарар дида, манзили ҳамаи онҳо аз тарафи 16 ташкилоту идораҳои вилоятӣ пурра ва бо сифати баланд барқарор карда шуданд.

Асрор Шокиров, раиси деҳаи Хоҷаи Аъло, ки манзили ӯ низ пурра ба коми оташ рафта буд, барои чунин таваҷҷуҳ ба Сарвари давлат, мақомоти маҳаллӣ ва ҳамаи онҳое, ки зарардидагонро дар рӯзҳои мушкил танҳо нагузошта, бо ғамхорӣ фаро гирифтанд, аз номи сокинони маҳалла арзи сипос кард.

- Самараи меҳрубониҳои Ҳукумати кишвар аст, ки боз дар манзили ободу зебо рӯзгорамонро пеш мебарем. Ҳамаи манзилҳо дар баробари барқарорсозӣ пурра бо таҷҳизоти рӯзгор, аз ҷумла яхдону мошини ҷомашӯйӣ, мебел ва палосу қолин таъмин гаштанд, - гуфт Асрор Шокиров. 

Сокинони деҳоти Хоҷаи Аъло ва Сомониёни Ҷамоати деҳоти Чоркӯҳи шаҳри Исфара барои кумаку ғамхорӣ ба Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон изҳори сипос намуда, таъкид карданд, ки баҳри ободиву сарсабзии диёр ҳиссагузор хоҳанд буд.

 

Ҷовиди АШТӢ, “Ҷумҳурият”