Аввалин бохти "Истиқлол" дар мавсими нав

Дар бозии мавқуфмондаи даври 3-юми Чемпионати Тоҷикистон оид ба футбол миёни дастаҳои Лигаи олӣ тими «Истаравшан» дар майдонаш «Истиқлол»-ро бо ҳисоби 2:1 шикаст дод. 

Тибқи иттилои Лигаи футболи кишвар, якум шуда меҳмонон бо голи задаи легионери ҷопонӣ Нома Риёта (дақ.37) ба пеш баромаданд. Соҳибони майдон дар дақиқаи 45+1 бо тӯби басамаррасондаи Илҳом Баротов натиҷаро баробар намуданд ва дастаҳо ба танаффус баромаданд. Голи ғалабаоварро дар нимаи дуюми бозӣ Бахтиёр Абдураҳмонов (дақ.81) зад.

 

 

ЧЕМПИОНАТИ АФОМ – 2021 

Тоҷикистон зинаи сеюмро гирифт

Мунтахаби Тоҷикистон дар даври ниҳоии Чемпионати Ассотсиатсияи футболи Осиёи Марказӣ байни бонувони то 17-сола аз тими Эрон бо ҳисоби 3:0 мағлуб гардида, мақоми сеюмро касб кард.

Дар бозии дигар Ӯзбекистон бар Афғонистон бо натиҷаи 8:0 пирӯз шуд.

Ҳамин тавр, мунтахаби Ӯзбекистон бо 7 хол унвони қаҳрамониро ба даст овард. Эрон бошад, бо 6 хол зинаи дуюмро гирифт.

 

 

ЧЕМПИОНАТИ АВРУПО

Англия бори аввал дар финали мусобиқот

Тими миллии Англия дар бозии даври нимниҳоии Чемпионати Аврупо оид ба футбол бар мунтахаби Дания пирӯз гардида (2:1) ба финал баромад.

Бар пояи маълумоти сомонаи ин мусобиқот, вохӯрии ниҳоӣ миёни тимҳои Италия ва Англия 11 июл дар варзишгоҳи Уэмбли (Лондон, Англия) баргузор мегардад.

 

Маҳмуд БАҲРОМ, 

шореҳи варзиш