Маҷлиси миллии Маҷлиси Олии Ҷумҳурии Тоҷикистон иттилоъ дод, муроҷиати дастаҷамъонаи намояндагони ҷомеаи шаҳрвандиро таҳти унвони «Мо ҷонибдори амнияти фарзандонамон», ки ба унвони Раиси Маҷлиси миллии Маҷлиси Олӣ Рустами Эмомалӣ дар шабакаҳои иҷтимоӣ нашр шудааст, мавриди баррасӣ қарор дорад.

Гуфта мешавад, ки ҳодисаи куштори ноболиғ Руфайда Иноятова, ки 4 июли соли 2021 дар ноҳияи Рӯдакӣ содир гардид, боиси нигаронии амиқи Раиси Маҷлиси миллии Маҷлиси Олӣ гардида, ҷараёни тафтиши ин ҷинояти мудҳиш зери назорати қатъӣ қарор дорад.

Рустами Эмомалӣ кумитаи Маҷлиси миллии Маҷлиси Олӣ оид ба таъмини асосҳои конститутсионӣ, ҳуқуқу озодиҳои инсон, шаҳрванд ва қонуният, инчунин, Прокуратураи генералиро муваззаф намудааст, ки ҷиҳати анҷом додани чорабиниҳои таъхирнопазири тафтишотӣ ва муайянсозии сабабу омилҳои ба содиршавии ин ҷинояти мудҳиш мусоидаткунанда тадбирҳои саривақтӣ ва зарурӣ андешида, ҳарчи зудтар тибқи талаботи қонун шахсони ҷинояткор ба ҷавобгарии ҷиноятӣ кашида шаванд.

 

 

БАРРАСИИ ВАЗЪИ АФҒОНИСТОН ДАР  МУЛОҚОТИ ВАЗИРОНИ КОРҲОИ ХОРИҶӢ

Бо ибтикори Вазорати  корҳои хориҷии Ҷумҳурии Исломии Афғонистон ва Маркази минтақавии СММ оид ба дипломатияи боздоранда барои Осиёи Марказӣ мулоқоти маҷозии вазирони корҳои хориҷии кишварҳои Осиёи Марказӣ ва Афғонистон баргузор гардид. Дар мулоқот вазири корҳои хориҷии Тоҷикистон Сироҷиддин Муҳриддин иштирок намуд. 

Ба иттилои Вазорати корҳои хориҷӣ иштирокдорон атрофи мавзӯъҳои раванди сулҳи Афғонистон, ҳамкории кишварҳои Осиёи Марказӣ ва Афғонистон дар самти мубориза бо чолишҳои амниятӣ, аҳамияти таъмини дастҷамъонаи рушди устувори минтақа ва рафъи пайомадҳои бемории COVID - 19 табодули афкор намуданд.

Сироҷиддин Муҳриддин нақши Тоҷикистонро дар рушди ҳамкорӣ дар соҳаҳои тиҷорату иқтисод, энергетика ва амният миёни давлатҳои Осиёи Марказӣ ва Афғонистон бориз таъкид кард.

 

 

ОМОДАГИИ ДАФТАРИ МИНТАҚАВИИ СММ  БАРОИ КУМАК БА САРҲАДБОНОНИ ТОҶИК

Зимни мулоқот бо сафири Ҷумҳурии Тоҷикистон дар Ҷумҳурии Ӯзбекистон Абдуҷаббор Раҳмонзода намояндаи минтақавии Дафтари СММ оид ба маводи мухаддир ва ҷинояткорӣ (UNODC) барои Осиёи Марказӣ  Ашита Миттал аз вазъияти баамаломада дар сарҳади Тоҷикистон ва Афғонистон изҳори нигаронӣ намуда, омодагии худро барои расондани кумакҳои техникӣ ба сарҳадбонони тоҷик баён кард. 

Дар ин бора Вазорати корҳои хориҷӣ хабар дода, менависад, ки ҷонибҳо, инчунин, аз раванди рушди ҳамкорӣ миёни Тоҷикистон ва UNODC қаноатмандӣ карда, тақвияти иқдомҳоро дар мубориза бо гардиши ғайриқонунии маводи мухаддир, мудирияти сарҳад ва такмили иқтидори миллӣ баррасӣ намуданд.

 

 

МАРКАЗИ МИЛЛИИ ТЕСТӢ.  ДАВРИ АСОСИИ ИМТИҲОНҲОИ ДОХИЛШАВӢ ҶАМЪБАСТ ШУД

Маркази миллии тестии назди Президенти Ҷумҳурии Тоҷикистон даври асосии имтиҳонҳои марказондаи дохилшавӣ ба муассисаҳои таълимии таҳсилоти миёна ва олии касбиро ҷамъбаст намуд, ки дар он 103 ҳазору 429 нафар номнавис гардида буд. Эълони натиҷаҳои имтиҳонҳо 20 июл дар нақша аст. 

Ба иттилои маркази матбуоти ММТ, дар 47 муассисаи таҳсилоти миёнаи  умумии 18 шаҳру ноҳияи ҷумҳурӣ марказҳои имтиҳонӣ фаъолият намуданд. Барои гузарондани раванди имтиҳонҳо 1937 корманди муваққатӣ тибқи шартнома фаъолият доштанд. Инчунин, барои назорат ва ёрии амалӣ дар омода кардани марказҳои имтиҳонӣ, назорати раванди имтиҳон дар марказҳои имтиҳонӣ ва мониторинги он, барои қабули қарори дахлдор дар сурати рух додани мушкилот 112 корманди асосӣ ва муваққатии марказ ҳамчун намояндаи ваколатдор иштирок доштанд.