Ҳаёт ва фаъолияти номзади илми педагогика дотсент Абдуҳаким Шарифов шоистаи ситоиш ва ибратпазир мебошад. Зеро зиндагии пурбаракати ӯ аз ҳар ҷиҳат сабақомӯз буда, роҳнамое барои насли ҷавони имрӯз аст. Саҳифаҳои рангини рӯзгори пурфайзи ӯ дар омӯзишу таҷрибаандӯзӣ, таълиму тарбияи насли наврас, ҷустуҷӯву пажӯҳиш, рушди корҳои сиёсиву ҷамъиятӣ, самараи масъулиятшиносӣ, таҳаммулпазирӣ, фидокорӣ нисбат ба вазифаҳои иҷрокардааш варақгардон мешаванд.

Роҷеъ ба фаъолияти Абдуҳаким Шарифов дар маҷмӯаи илмии «Раҳнаварди ҷодаи саодат» маълумоту андешаҳои саҳеҳу дақиқ ва ҷолиб гирд омадаанд.

Номбурда аз хушбахт касонест, ки ҳаёташро ба манфиати халқу миллат тавъам намуд ва дар байни ҷамъият соҳиби эҳтирому эътибор гашт. Маҳз меҳнати ҳалол, масъулиятшиносӣ дар назди халқ, ғамқарину шодишарики дигарон будан, эҳтироми халқро барояш чун ҷоиза эҳдо кард. Ин байти шоир Тошхӯҷаи Асирӣ шиори зиндагии Абдуҳаким будааст:

Одамият чист? Худро дур аз шар(р) доштан, 

Хайрхоҳи халқ будан, нафъи безар доштан. 

Ба ҷуз аз он ки дар корҳои ҷамъиятиву сиёсӣ фаъол буду солҳо дар мақомоти иҷроияи ҳокимияти давлатии вилояти Суғд кор кард, ҳаргиз дилаш, вуҷудаш аз тарбияи шогирдон, кори омӯзгорӣ канда набуд. Меҳри омӯзгорӣ дар ниҳоди ӯ азалӣ будааст. Абдуҳаким Шарифов ҳама тавфиқу комёбӣ ва ҷодаҳои сарбаландона паймудаашро аз баракату иқболи ин касб медонад. Ба андешаи ӯ, маҳз омӯзгори хубу қавиирода метавонад дар бунёди ҷомеаи солим, рушди соҳаҳои гуногун, ободии диёри аҷдодӣ саҳм гирад. Пайваста таъкид мекунад, ки саодату шарофатҳои касби омӯзгорӣ зиёданд, зеро тапиданҳои муназзами набзи ҷомеа аз фаъолияти устоду мураббӣ вобастагии зиёд дорад.

Чанде пеш дар шаҳри Хуҷанд ба хотири фаъолияти меҳнатиаш маҳфили ҳампешагону шогирдонаш баргузор шуд. Ҳама аз сифатҳои ҳамидаи  Абдуҳаким Шарифов гуфтанд. Худи ӯ бо хоксорӣ изҳор дошт, ки дар ҳар ҷода, агар ба муваффақияте даст ёфтааст, аз хушбинии ҷомеа, аз меҳру муҳаббати мардум аст.

Ӯ дорандаи Ифтихорномаи Ҳукумати Ҷумҳурии Тоҷикистон, нишони «Аълочии фарҳанги Ҷумҳурии Тоҷикистон» буда, имрӯзҳо низ роҳбари садҳо шогирдон, пешбарандаи корҳои илмиву тадқиқотӣ ва яке аз фаъолони бунёди ҷомеаи демократист.

 

Парвина АМОНОВА, ноҳияи Деваштич