Хабарҳо
Толибон нақшаҳои худро ошкор намуданд
Лента. ру. Ҳаракати «Толибон» дар ҷамъбасти гуфтушунид дар Москва нақшаҳояшонро перомуни Афғонистон ва дигар кишварҳо ошкор карданд. Дар ин хусус АИР «Новости» бо истинод ба изҳороти идораи сиёсии ҳаракати мазкур иттилоъ медиҳад.
Ҳайати «Толибон» бо сарварии яке аз роҳбарони ҳаракати мазкур дар Қатар Шаҳобуддин Диловар 8 июл ҷиҳати гуфтушунид вориди Россия шуданд ва сафари онҳо ду рӯз идома меёбад. Онҳо бо намояндаи махсуси Президенти Россия оид ба Афғонистон Замир Кобулов дидор анҷом доданд.
Зимни вохӯрӣ Кобулов аз вазъи изтиробовари шимоли Афғонистон изҳори ташвиш намуда, аз Толибон даъват кард, то нагузоранд муноқиша аз ҳудуди Афғонистон берун шавад. Дар ҷавоб ба ин гуфтаҳо ҳайати Толибон иттилоъ доданд, ки нияти истифода бурдани ҳудуди Афғонистонро барои ҳамла ба дигар кишварҳо, аз ҷумла Россия, надоранд. Аъзои ҳайат амнияти марзҳои кишварҳои Омиёи Марказӣ ва намояндагони хориҷиро дар кишвар кафолат доданд.
Конфронси байналмилалӣ дар Тошканд
CentralAsia (UZ) . 15 - 16 июл бо ташаббуси Президенти Ӯзбекистон Шавкат Мирзиёев дар Тошканд Конфронси байналмилалии «Осиёи Марказӣ ва ҷанубӣ: ҳамбастагии минтақавӣ. Талабот ва имконот» баргузор мегардад.
Мақсади асосии форум таҳкими иртиботи таърихӣ ва дӯстона, боварӣ ва ҳусни ҳамҷаворӣ миёни давлатҳои Осиёи Марказӣ ва Ҷанубӣ ба манфиати ҳамаи халқҳо ва кишварҳои ҳар ду минтақа мебошад.
Дар конфронс иштироки президентҳои Ӯзбекистон, Афғонистон, Покистон, вазирони корҳои хориҷӣ, намояндагони баландмақоми кишварҳои Осиёи Марказию Ҷанубӣ ва дигар давлатҳои хориҷӣ, роҳбарони созмонҳои муътабари байналмилаливу минтақавӣ, донишгоҳу ширкатҳои иқтисодии глобалӣ, марказҳои пешоҳанги илмӣ – таҳқиқотӣ ва таҳлилӣ ба нақша гирифта шудааст.
Иштирокдорони форум имкониятҳои таҳрик додани ташаббусҳои рушди ҳамкории тиҷоратӣ - иқтисодӣ, нақлиётӣ - коммуникатсионӣ ва маданӣ - гуманитариро баррасӣ менамоянд.
Ҳамкории Россия ва Туркия оид ба муқовимат бо терроризм
Лента. ру. Прокуратураи генералии Россия ва Вазорати адлияи Туркия барномаи ҳамкориҳоро барои солҳои 2021 - 2022 ба имзо расонданд. Ҳуҷҷат дар рафти вохӯрии прокурори генералии Россия Игор Краснов ва муовини вазири адлияи Туркия Яъқуб Могул тасдиқ гардид.
Барномаи мазкур қарори Москва ва Анқараро оид ба ҳамкорӣ дар самти муқовимат ба терроризм ва киберҷинояткорӣ инъикос менамояд.
«Амалигардонии чорабиниҳои мазкур донишҳои ҳуқуқии моро ғанӣ гардонда, барои қадами устувор гузоштан дар самти ҳамкориҳои самарабахш ҷиҳати амнияти халқҳо ва кишварҳоямон шароит фароҳам меорад», - таъкид кард Краснов.
Прокурори генералии Россия ба рушди ҳамкориҳои оянда бо идораҳои соҳаи амнияти Туркия изҳори умед кард.
Баёни ақида (0) Санаи нашр: №: Мутолиа карданд: 846