Маркази матбуоти Қӯшунҳои сарҳадии Кумитаи давлатии амнияти миллии Ҷумҳурии Тоҷикистон хабар медиҳад, ки соати 14:55-и рӯзи 8 июли соли 2021 -ум 4 сарҳадбони қирғиз марзи давлатии Ҷумҳурии Тоҷикистонро дар минтақаи Росровути ноҳияи Деваштичи вилояти Суғд ғайриқонунӣ убур намуд.

Низомиёни  қирғиз  дар  тан  либоси омехтаи мулкиву ҳарбӣ дошта, бо силоҳи оташфишони "АК" мусаллаҳ буданд. Онҳо мақсад доштанд, ки аз ҳудуди Ҷумҳурии Тоҷикистон 9 сар аспи сокинони ноҳияи Деваштичро ба қаламрави Ҷумҳурии Қирғизистон интиқол диҳанд.

Сарҳадбонони қирғиз ба амри марзбонони Тоҷикистон оид ба вайрон кардани хати сарҳади давлатӣ итоат накарда, ба сӯи сарҳадбонони тоҷик аз силоҳ оташ кушоданд. Дар натиҷаи тирпарронии ҷавобӣ 2 сарҳадбони қирғиз захмӣ гардид.

Мақомоти дахлдори ду кишвар дар ҷойи ҳодиса қарор дошта, қазияро таҳқиқ менамоянд.

 

 

Эътимодномаи намояндаи доимии Тоҷикистон ба Дабири кулли СММ

Намояндаи доимии  Ҷумҳурии Тоҷикистон дар Созмони Милали Муттаҳид Ҷонибек Ҳикмат ба Дабири кулли созмон Антониу Гутерриш эътимоднома супурд. Дар ин бора Вазорати корҳои хориҷӣ иттилоъ дод.

Дар мулоқот ҷонибҳо ташаббусҳои Президенти Ҷумҳурии Тоҷикистон муҳтарам Эмомалӣ Раҳмонро дар соҳаи обу иқлим, аз ҷумла Даҳсолаи амал «Об барои рушди устувор» ва эълон намудани соли 2025 ҳамчун Соли байналмилалии ҳифзи пиряхҳо мавриди баррасӣ қарор дода, вобаста ба масъалаҳои амният дар минтақаи Осиёи Марказӣ, хусусан Афғонистон мубодилаи афкор намуданд.

 

 

Ҷаласаи кории СҲШ дар самти ҷавонон

Таҳти раёсати Ҷумҳурии Тоҷикистон ҷаласаи дуюми гурӯҳи корӣ вобаста ба пайгирии лоиҳаи Созишнома байни мақомоти ваколатдори давлатҳои аъзои Созмони ҳамкории Шанхай оид ба ҳамкорӣ дар самти кор бо ҷавонон тариқи онлайнӣ баргузор гардид. 

Муовини якуми раиси Кумитаи кор бо ҷавонон ва варзиш Ризо Назарзода зимни иштирок ва суханронӣ гуфт, ки лоиҳаи Созишнома оид ба ҳамкорӣ дар самти кор бо ҷавонон аз ҷониби Ҷумҳурии Тоҷикистон омода гардида, он барои рушди минбаъдаи ҳамкориҳои байналмилалии ҷавонон дар доираи СҲШ равона шудааст.

Лоиҳаи созишнома дар ҷаласаи навбатии Шӯрои сарварони давлатҳои СҲШ, ки 16-17 сентябри соли равон дар шаҳри Душанбе доир мегардад, барои имзо пешниҳод мешавад.

 

 

ДУШАНБЕ 

4 мусобиқаи байналмилалӣ оид ба теннис доир мешавад

Аз 12 июл то 7 августи соли равон дар кортҳои «Роҳи оҳани Тоҷикистон» ва ҶДММ «Тоҷварз» 4  мусобиқаи байналмилалӣ оид ба теннис доир мегардад. Мусобиқоти мазкур бо ташаббуси Кумитаи кор бо ҷавонон ва варзиш дар ҳамбастагӣ бо Федератсияи тенниси Тоҷикистон доир шуда, дар он иштироки беш аз 100 варзишгар дар назар аст.

Ба иттилои кумита, инчунин, бори аввал аз 30 июл то 7 август мусобиқа оид ба теннис миёни наврасон барои дарёфти Ҷоми Президенти Тоҷикистон бо унвони «President Cup - 2021» ба нақша гирифта шудааст. Аз ҷумла, 2 мусобиқа миёни наврасони то 14 - сола ва 2 мусобиқа миёни ҷавонони то 18 - сола.

 

 

COVID - 19

Беш аз 98 дарсади сироятшудагон шифо ёфтанд

Шабонарӯзи охир дар Тоҷикистон  29 ҳолати нави гирифторшавии шаҳрвандон ба бемории коронавирус сабт гардид. Ҳамчунин,  24 нафар пас аз муолиҷа солим гардонда шуд, - хабар медиҳад маркази матбуоти Вазорати тандурустӣ ва ҳифзи иҷтимоии аҳолӣ.

Дар маҷмӯъ, аз аввали пандемия то рӯзи 8 июл дар кишвар 13719 нафар гирифторони COVID-19 сабт шуда, аз ин то санаи зикргардида 13461 нафар (98,2%) шифо ёфтаанд. 

Вазорати тандурустӣ ва ҳифзи иҷтимоии аҳолӣ аз сокинон даъват ба амал меорад, ки дар ҷойҳои ҷамъиятӣ қоидаҳои пешгирикунандаи бемории коронавирусро қатъиян риоя намоянд.